Gouvernman pou byento kre en komisyon delo |08 October 2015

Gouvernman pou byento kre en Komisyon Delo. Sa nouvo komisyon pou kapab regle e kordin leksplwatasyon resours delo dan Seychelles.

Se Minis pour Lanvironnman, Lenerzi e Sanzman Klima Didier Dogley ki ti fer sa lanons letan i ti pe reponn kestyon bann manm dan Lasanble Nasyonal Mardi. Sa komisyon Msye Dogley ti dir, i sipoze ganny met an plas lannen prosenn.

Dan Lasanble Mardi, Minis Dogley ti osi reponn kestyon lo sitiasyon delo lo Praslin e La Digue, kot i ti dir ki dan kad ‘Water Master Plan’ ki ti devlope an 2008, son minister in fer en letid lo kapasite bann larivyer lo Praslin avek bi amelyor kapasite stokaz e annan en meyer distribisyon delo lo sa zil. I ti azoute ki antretan, Korporasyon Litilite Piblik (PUC) in envestir dan en nouvo rezervwar Fond B’Offay, enstal plis tiyo sorti kot sa rezervwar e ogmant kapasite stasyon desalinasyon. PUC in osi repar e ranplas bann vye tiyo Baie Ste Anne e pou byento fer menm travay Grand Anse Praslin.

Minis ti devwale ki gouvernman pe osi regard posibilite pour konstri en danm La Plaine Hollandaise, alor ki desalinasyon i reste en dezyenm opsyon dan distribisyon delo.

«Tan ki i annan delo dan larivyer, i preferab pran delo dan larivyer e distribye. Desalinasyon i zis en back up”, i ti presize.

Dan ka La Digue, Minis Dogley ti dir ki PUC pe etidye opsyon en sistenm fouy pi ki a retir delo sorti anba later.

Vi ki i annan bokou letablisman touristik ki konsonm bokou delo lo sa de zil, i ti azoute ki gouvernman pe an menm tan ankouraz partenarya piblik prive (PPP), pour ki bann biznes i kapab kontribye dan prodiksyon, stokaz e distribisyon delo e osi lenerzi an zeneral.

Avek bi mye prezerv bann sours delo, Msye Dogley ti dir ki son minister pou kontinyen pran mezir neseser pour ki dimoun pa polye bann larivyer avek salte.

An se ki konsern lanmar, Minis responsab pour Lanvironnman ti donn lasirans ki gouvernman pe kontinyen dan son zefor pour netway bann lanmar e osi deblok bann lanbousir pour evit linondasyon. I ti azoute ki atraver progranm netwayaz lanmar, departman lanvironnman pe osi kontinyen dan son zefor pour elimin leti lanmar. Sa i en lespes egzotik anvaisan ki’n ganny entrodwir isi e ki en menas pour lezot lespes.

Minis Dogley ti termin par ankouraz lezot partner ki lanmar i lo zot propriete pour travay ansanm avek gouvernman pour asir zot proteksyon e proteksyon bann lespes ki viv dan sa labita. I ti sit legzanp lanmar Port Launay ki pe ganny byen zere avek partenarya Lotel Ephelia, distrik Port Glaud e Lorganizasyon Non Gouvernmantal S4S (Sustainability for Seychelles).