Follow us on:

Facebook Twitter LinkedIn YouTube

Archive -National Assembly

Ile Persévérans pa pou en rezyon elektoral pour prosen eleksyon |09 October 2015

Menm si Lasanble Nasyonal in sa semenn vote pour ki Ile Persévérance i vin en rezyon elektoral, sa pa pou posib pour prosen eleksyon prezidansyel ki pou fer le 19, 20 e 21 Novanm.

Se tyermenn Komisyon Eleksyon Hendricks Gappy ki ti donn sa leksplikasyon pandan en konferans de pres yer bomaten, ler i ti pe anons dat eleksyon.

Msye Gappy in donn kat rezon akoz Ile Persévérance pa pou kapab vin en sirkonskripsyon elektoral pour prosen eleksyon. Sa i premyerman akoz menm si Lasanble Nasyonal in vot an faver sa proze de lwa, i pa ankor ganny sinnyen par Prezidan James Michel pour li ofisyelman vin lalwa.

Dezyenmman, fodre ki en voter in reste omwen trwa mwan dan en landrwa ki’n ganny deklare distrik elektoral avan i kapab vot dan sa distrik. Dan ka Ile Persévérance, i pa posib pour li vin en distrik elektoral dan sa dele letan, vi dat prosen eleksyon.

Trwazyenmman, dapre lalwa rezis voter in fermen depi yer avek lanons dat eleksyon. I pa posib alor pour le moman pour transfer okenn non lo sa ki pou evantyelman vin nouvo lalis Ile Persévérance.

Anfen, tyermenn Komisyon Eleksyon in prezise ki balizaz distrik Ile Perévérance pa ankor dekoupe.

Komisyon Eleksyon in sepandan anonse ki pour fasilit prosedir vote pour bann voter ki reste Ile Persévérance, en stasyon vote spesyal pour enstale laba, menm si zot pou vot dapre distrik elektoral kot zot in anrezistre.

 

 

 

 

 

» Back to Archive