Follow us on:

Facebook Twitter LinkedIn YouTube

Archive -Entertainment

De zenn artis Praslinwa i lans zot albonm Pou Vre |09 October 2015


 

De zenn Pralinwa – Ryan Medor ek Wilbert Roucou – in zwenn ansanm pour met lo marse en albonm avek tit Pou Vre.

Ryan Medor, koni koman RCM,  i deza annan en premye albonm avek tit Milyon Rezon ki’n sorti i annan enpe letan, tandis ki Wilbert Roucou, ki son stage name i Rockman, li i fer premye fwa ki i pe lans li dan en tel proze.

Sa 2 zenn zan i dir ki zot travay in komans vann sa semenn.

Dan en rankont avek zournal Nasyon zot ti dir ki sa 11 sanson lo zot albonm i zot prop konpozisyon e tenm ki zot in swazir pour sant lo la i lanmour akoz zot dir i pli fasil pour sant lo la e i fasil pour ganny aksepte e apresye.

Sa albonm in ganny prodwi par Steve Narty aka Selectah Narty e Nicholas Folette aka Magnificent kot Island Sound Record stoudyo ki baze Praslin menm.

Me akoz zot in deside zwenn ansanm pour fer sa travay e non pa sakenn pour li an solo?

«Nou’n groupe pour fer nou lavwa tande akoz Praslin lo kote lanmizik nou ankor anba e sa i en fason pour fer Mahe konnen nou la,» Ryan ti fer resorti. 

Ryan ti azoute ki stil zot bann sanson pou satisfer tou gou e dimoun tou laz. Zot annan sega, dancehall ek reggaetone.

Me akoz Pou Vre?

«Sa i tit sanson nimero 5 ki nou toulede nou sante e i koz lo vre lanmour. Nou pe asir en dimoun ki nou vreman kontan li, sirtou si i pa a pe krwar nou. Nou pe fer li konpran ki nou vreman kontan li,» Ryan ti eksplike.

Dapre sa de zenn bann sanson lo zot albonm i byen ritme e zot konvenki ki piblik pou byen apresye sirtou bann sega parey Separ Mon, Plito ou ale osi byen ki lezot tit parey En lot laz ki en sanson pour swet bonn aniverser en dimoun e Fini Anpaye avek partisipasyon Magnificent.

In pran zot 6 mwan pour prodwi sa albonm e zot pe dir tou dimoun ki apresye lanmizik Kreol ki zot pa pou dezapwente.

«Nou vreman anvi dimoun konnen ki nou osi nou kapab fer bon lanmizik,» Ryan ti azoute.

Lo son kote Wilbert i dir ki zot vreman satisfe avek rezilta sa travay e zot garanti ki «nou pou reisi fer li en sikse».

Sa 2 zenn i dir zot pe osi travay lo en konpilasyon Nwel osi byen ki lezot travay ankor.

Sa albonm pe vann avek sa 2 zenn zot menm e Kot Do lo Mahe.

 

M-A. L.

 

 

 

 

» Back to Archive