Florette Botsoie i met son premye albonm lo marse |09 October 2015

Nou Rasin i tit nouvo albonm par Florette Botsoie e sa travay in fek ariv lo marse.

Sa i  premye albonm  Florette e dan en pti antretyen avek zournal Nasyon sa semenn sa santez i dir travay pour komans realiz sa albonm ti demare  an 2012.

«Mon’n ganny enspire bokou  pour par lavi toulezour, bann dekalaz spirityel ek bann problenm ki mon’n trouve e tande,» Florette ti eksplike.

Parmi bann diferan laspe lavi ek lasosyete an zeneral  ki in touse dan son bann sanson i lanmour, lazenes, lafanmir e moralite.

Lo sa albonm i osi annan 2 sanson konpoze par Joseph Louise me sante par Florette  e in swazir Ion Kid e son fiy Jill Botsoiepour akonpanny li lo sa de sanson.

Fodre dir ki Florette ti komans sante a laz 22-an e i osi en artis ki  byen koni lo lasenn teat e pour son letan dan benn ‘Sunshine’ ansanm avek John Vital ek Cyril Vital dan bann lannen 1988.

Pour manm piblik ek son bann fàn Florette i dir zot aste orizinal e apresye sa koleksyon sega, reggae, soukous, moutya, lorizin laten e osi en bon sekous (sega melanze ek soukous).

Pour  tou bann ki pe mazin met enn sa  albonm dan zot koleksyon Florette pe osi konsey zot pour ekout sa bann sansonswivan avek boukou latansyon:  ‘Douler’, Byen fer’, ‘Beau Soleil’, ‘Glory of the Lord’, ek ‘Douler featuring Ion Kid’.

Sa artis i profite pour remersye tou dimoun ki’n ed li dan en fason ou en lot pour fer son albonm vin en realite.

Sa konpilasyon 12 sanson i anvant kot ansyen Kot Do e i kout 125 roupi kopi me ou kapab ganny ou kopi pour zis 100 roupi avek sa artis li menm.

Ralista Hortere