Final enterskoler konpetisyon ladans kanmtole ek romans |10 October 2015

Bann zelev ek etidyan pos segonder i montre ankor zot talan

Grand Anse Praslin primer, Anse Boileau segonder ek Lakademi Tourizm i bann gran venker ladans kanmtole organize dan kad aktivite pour mark Festival Kreol tou le lannen.

Nouvo sa lannen se konpetisyon romans ki’n ganny azoute dan sa 3enm edisyon konpetisyon ladans kanmtole kot Mont Fleuri primer, Praslin segonder ek Lekol pour Letid Avanse ti bann ganyan.

Final sa konpetisyon ti deroul kot Lasal Teat Nasyonal, Mont Fleuri, Zedi apremidi dan prezans sekreter prensipal pour Ledikasyon Pos-Segonder, Planifikasyon, Resours Imen ek Devlopman Lenfrastriktir Dokter Linda Barallon, bann o zofisye Minister Ledikasyon ek bann siporter sorti dan sa bann lekol ki ti’n desann pour donn sipor zot bann danser, dansez, santer ek santez.

Sa konpetisyon i en linisyativ Minister Ledikasyon avek lobzektif pour promouvwar konesans e kapasite bann etidyan dan domenn ladans tradisyonnel ek romans.

Ti annan trwa kategori ladans e dan sak, bann group ti bezwen dans trwa kalite ladans e sa ti konm swivan: primer – kotis senp, kotis doub ek avande; segonder – kotis anglisan, mazok, avantrwa; e pos-segonder –berlin, polka ek final.

Pour romans ti osi annan 3 kategori: primer, segonder e pos-segonder.

Apre ki tou group ti’n fini performen e fer tranble lasal, latas sa sis manm ziri ti komanse e sa pa ti fasil ditou akoz tou bann finalis ti determinen pour ranporte.

Me alafen dan kanmtole pour kategori primer Anse Boileau pa’n kapab defann son tit ki i ti gannyen lannen pase e se Grand Anse Praslin ki’n sorti gran venker. Anse Boileau ti pran dezyenm plas e La Retraite ti sorti trazyenm.

Dan kategori segonder Anse Boileau ti pran premye plas parey lannen avan, tandi ki English River ti sorti dezyenm e Beau Vallon trwazyenm.

Dan kategori pos-segonder Lakademi Tourizm (STA) ti pran premye plas, Lekol pour Letid Biznes (SBSA) dezyenm plas, Lekol pour Letid Avanse (SALS) ti trwazyenm e Lenstiti pour Ledikasyon Ansenyan (SITE) ti katriyenm.

Dan romans pour kategori primer Grand Anse Mahe, Grand Anse Praslin e Mont Fleuri ti pran trwa premye plas.

Pour segonder se Praslin ki ti venker swivi par Beau Vallon e trwazyenm ti Pointe Larue.

Dan kategori pos-segonder SALS ti pran premye plas e SITE ti bezwen kontant avek dezyenm e trwazyenm pozisyon.

Tou group ki ti sorti premye dan sak kategori ti ganny en trofe ek meday e tou bann lezot gannyan ti resevwar en meday.

Kordinater sa konpetisyon, Norbert Dogley, ki en zofisye ledikasyon, ti fer resorti ki partisipasyon in ogmante konpare avek bann lannen avan.

«Performans in ogmant konsiderableman e nou kapab dir ki nou’n ganny preski 90% partisipasyon bann lekol,» i ti dir.

Msye Dogley i dir ki i byen satisfe avek kalite ladans ki’n amelyore vi ki serten ladans ti’n sanze dan enn de kategori.

«Nou pa’n reste statik dan kategori ladans. Lannen pase ti annan vals ek avankat tandi ki sa lannen nou’n tire e met lezot. Alafen nou’n vwar sa bann zenn in byen debrouye e nou byen satisfe avek kalite ladans ki zot in vin avek,» i ti dir.

I ti azoute: «Pour romans vi ki i premye lannen ki nou fer li, nou ase satisfe, me la bann lekol i okouran sa kategori i egziste e fodre zot prepar zot pli boner pour lannen prosenn.»

Msye Dogley in osi remersye bann departman ek endividi ki’n kontribye pour fer sa levennman vin en sikse sirtou sipor finansyel sorti kot Konsey Nasyonal pour Lar (NAC), Konsey Nasyonal pour Lazenes (SNYC), Minister Tourizm ek Kiltir, ek Minister Ledikasyon.