Roy Fonseka, kandida vis-prezidansyel SPSJD |07 November 2015

Roy Fonseka pou kandida vis-prezidansyel Parti pour Lazistis Sosyal e Demokrasi (SPSJD) dan prosen eleksyon prezidansyel ki pou fer le 3, 4 ek 5 Desanm. I pou debout akote lider sa parti Alexia Amesbury, ki ti’n anons son kandidatir pour pos prezidan pei depi en pe letan.

Msye Fonseka i annan 64-an e i en ansyen solda larme angle, kot in pas bokou letan dan Lafors Spesyal (Special Forces). I aktyelman proprieter lakonpannyen sekirite ‘Pilgrims Security’ e i osi tyermenn Lasosiasyon bann Veteran.

Madanm Amesbury ek Msye Fonseka pou konteste sa eleksyon anba slogan ‘En swa ki ou kapab kont lo la’ oubyen ‘A choice you can trust’ an angle.

Se sekreter zeneral parti Jane Rath ki ti formelman anons kandidatir Madanm Amesbury, ki ti a son tour anons kandidatir Msye Fonseka. Sa ti pandan en rankont kot lotel Beau Vallon Bay yer swar.

Prezan ti bann manm SPSJD e osi lider parti Lalyans Seselwa Patrick Pillay. Msye Pillay ti dir ki son prezans sete pour montre solidarite avek Madanm Amesbury e SPSJD.

I ti azoute ki in vwar bokou bon lide ganny prezante pandan sa rankont, lide  ki i dir fotespere pa ganny vole par Parti Lepep.

Msye Pillay ti konklir ki i kontan ki i annan en group determinen pour donn en ‘challenge’ sa parti ki’n o pouvwar pour 38-an, e pour donn en swa pep Seselwa.

Madanm Rath ti dekri Madanm Amesbury konman en defanser drwa imen e lazistis sosyal ki’n anmenn plizyer zafer an kour kont gouvernman.

Lo son kote, Madanm Amesbury in dir ki Msye Fonseka i en lider kredib e en biznesmenn avek bokou leksperyans, ki kapab anmenn en sanzman dan Sesel, sirtou dan lanvironnman biznes.

Msye Fonseka in eksprim lespwar ki le 5 Desanm Sesel pou ganny en nouvo gouvernman. In azoute ki dan lopozisyon i annan ase dimoun ki kapab anmenn sa pei dan en nouvo peryod.

“Seselwa pe dir ase, in ase,” i ti dir.

Pandan lasware, SPSJD ti osi prezant son manifesto pour sa prosen eleksyon. Bann gran laliny sa manifesto i prezant nesesite pour lalit kont lapovrete e redres lekonomi, netway gouvernman e reform bann lenstitisyon nasyonal, aboli bann lalwa ki an kontradiksyon avek nou Konstitisyon e protez drwa imen, geri bann divizyon lepase e donn en meyer lavenir nou zanfan e prezerv nou leritaz nasyonal, kiltir ek lanvironnman.