Madanm Amesbury i promet «en gouvernman lepep, par lepep e pour lepep» |09 November 2015

Madanm Amesbury pe adres lodyans pandan miting Vandredi swar

Si Parti pour Lazistis Sosyal ek Demokrasi (SPSJD) i ganny eleksyon le 5 Desanm, son gouvernman ki pou vin opouvwar pou ogmant pansyon bann dimoun pour vin 7,000 roupi sorti 3,100 roupi e bann etidyan pos segonder pou ganny en alawenns 4,000 roupi par mwan.

Se lider sa parti e kandida prezidansyel Alexia Amesbury ki ti dir sa kot lotel Berjaya Beau Vallon Bay Vandredi swar, letan i ti pe lans son manifesto pour sa prosen eleksyon.

Madanm Amesbury ti dir ki sa manifesto i asir «en gouvernman lepep, par lepep e pour lepep».

I ti anonse ki an ka i ganny eleksyon, i pou form en gouvernman koalisyon kot bann minis pou sorti dan diferan parti politik ek sekter sosyete.

SPSJD pou osi sanz manda prezidansyel pour vin de manda senk an ou menm 4-an, konpare a trwa manda 5-an parey i ete konmela.

Osi, en prezidan pa pou kapab «pas baton» avek son vis-prezidan, e imedyatman apre en eleksyon, dat sa enn ki pou fer dan prosen 5-an pou ganny anonse.

Enn bann pwen pli enportan lo azanda Madanm Amesbury se lalit kont koripsyon. In dir ki pour anpes son gouvernman vin koronpi, bann minis pou swiv en kod etik strikt e pou devwal tou zot larises ki pou ganny pibliye dan en dele 30 zour apre eleksyon.

In azoute ki son gouvernman pou met an plas en Komisyon Lanket ki pou fer lenvestigasyon dan tou bann krim lepase, enkli koripsyon.

«Si nou pou viv konman en nasyon ini, in ler pour met sa bann zafer ater,» i ti dir.

I ti anonse ki par egzanp, pou annan en reform dan lavant later ki i dir konmela i ankouraz koripsyon.

Dan kad sa reform, dimoun ki’n ganny later atraver koripsyon ou ki’n pey selman en roupi pou bezwen rann sa bann later.

Pour bann ki’n fini vann sa bann later, zot pou bezwen rann larzan e dimoun ki denons sa bann tranzaksyon koronpi pou menm ganny en poursantaz sa larzan.

Lo kote diskriminasyon kont Seselwa, Madanm Amesbury in dir ki i pou elimin sistenm aktyel kot travayer etranze i ganny pli byen peye e i annan pli bon kondisyon ki travayer Seselwa.

In promet pour osi sanz sistenm welfer e fer li plito vin sa ki in apel en «..........workfer ki a fer Seselwa revin travay».

«Seselwa pa’n ganny formasyon neseser ki fer ki ozordi menm peser i etranze,» i ti fer resorti.

Lider SPSJD ti fer rapel ki «nou pli gran resours se nou bann dimoun» e ki fodre «donn zot meyer ledikasyon, manze, lozman ek lasante ki bann drwa konstitisyonnel».

«Fodre arete si ou pa ek nou ou pa pou ganny sa. Sa i kont Konstitisyon e fodre arete,» i ti ensiste.

Madanm Amesbury ti osi koz lo en Lasirans Lasante ki pou permet Seselwa annan swa pour al kot dokter piblik ou prive e osi al sonnyen deor.

In osi promet en meyer sistenm distribisyon delo, «akoz konmela nou pe bwar delo sale».

«Si delo pe touy pwason, ki pou arive avek Seselwa? Lefe ki gouvernman i ponp delo sal pour donn nou pour bwar, sa i meyer rezon pour tir li o pouvwar,» i ti dir.

Me konman SPSJD pou ganny larzan pour finans son bann progranm ? Premye larepons, se ki i pou fer aboli det eksteryer e aboli pansyon bann ansyen minis ek Manm Lasanble Nasyonal.

«Nou pa pou pey det SPPF. Sa ki’n soz son soz a soz limenm,» Madam Amesbury ti dir.

I ti azoute ki son gouvernman pou osi ankouraz plis partenarya piblik prive (PPP) e aplik en meyer redistribisyon reveni lo lendistri tourizm ek lapes.

Dan sa konteks i ti demann de kestyon :

«Oli sa bann milyon ki nou gannyen avek Linyon Eropeen pour ki zot bann bato i lapes dan nou delo?»

E, «Akoz dan 100 dolar ki en touris i depanse zis 5 dolar ki reste Sesel?»

Madanm Amesbury in dir ki son parti pou osi redevlop bann lendistri tradisyonnel parey leksportasyon kannel.

I pou egalman redwir popilasyon prizon kot i ti soulinyen ki aktyelman «en prizonyen i kout pei 100,000 roupi par an».

Zisteman, lider SPSJD in dir ki son parti pou sirtou travay lo bann revizyon legal. Dan en sitiasyon kot i dir ki «ozordi Sesel i annan rikord pour lakantite dimoun dan prizon e ki enzekte drog,» in anonse ki «drog pou nepli ganny konsidere konman en problenm legal me konman en problenm medikal».

«Ladiksyon i en maladi,» i ti ensiste.

An konsekans, anba en gouvernman dirize par Madanm Amesbury «bann dimoun ki ganny atrape an posesyon kanabis pa pou al prizon me pou plito kondann en lanmann e ganny trete pour zot adiksyon».

«I annan santans lavi prizon pour drog. Eski prosen santans i lanmor?» i ti demande.

Sepandan, in ensiste ki lalwa pou sever avek bann trafiker, menm si prizonnyen ki’n kondann pour drog pou ganny zot remisyon.

I ti eksplike ki pour pa donn en prizonnyen son remisyon i kontrer avek  lartik 27 nou Konstitisyon.

Enn bann fason redwir popilasyon prizon Madanm Amesbury ti dir, se par pardonn bann ki merite. I ti fer rapel ki pandan 12-an, Prezidan Michel pa’n pardonn okenn prizonnyen e ki sa i kontrer a leker konpasyon ki Prezidan Michel i dir i annan.

En lot fason, i ti azoute, se pour elimin bann santans mandatwar ki’n vote par Lasanble Nasyonal.

«Se en ziz ki ekout zafer e pas santans e non pa Lasanble Nasyonal,» i ti ensiste.

Madanm Amesbury in konklir ki lazistis i devret ganny delivre pli vitman e in osi ensiste ki labi kont bann madanm ek zanfan i devret arete.

«Fodre donn bann madanm zot vre plas e menm loportinite avek bann zonm pour zot kontribye dan sosyete,» in dir.

An ka ki i vin o pouvwar, SPSJD in anonse ki i pou osi organiz en referenndonm ki pou deside si pour sanz lartik 33 Konstitisyon ki anpes maryaz ant dimoun menm seks.