Komisyon Eleksyon i tir o sor pour pozisyon kandida lo papye vote ek lord PPB |12 November 2015
Komisyon Eleksyon ti yer swar tir o sor pour determinen ki pozisyon bann kandida prezidansyel pou aparet lo papye vote, e osi dan ki lord zot pou fer zot broadcast politik (PPB) lo radio ek televizyon SBC.
Tiraz o sor ti deroul dan prezans reprezantan sa sis kandida ki pe konteste eleksyon. Se bann reprezantan zot menm ki ti tir bann boul dan sak pour determinen dan ki pozisyon zot kandida pou aparet lo papye vote e lord dan lekel zot pou fer zot PPB.
Se kandida Parti Lepep James Michel ki pou aparet premye anler lo papye vote. I pou swiv dan lord vertikal par kandida Mouvman Demokratik Popiler (PDM) David Pierre, kandida Lalyans Seselwa Patrick Pillay, kandida Parti Nasyonal Seselwa (SNP) Wavel Ramkalawan, kandida Parti pour Lazistis Sosyal ek Demokrasi (SPSJD) Alexia Amesbury e se kandida endepandan Philippe Boulle ki pou dernyen anba lo papye.
Dan ka PPB, SBC pe ofer bann kandida senk slot ki pou al ant Lendi le 16 Novanm e Mardi le 1er Desanm. Se kandida Lalyans Seselwa Patrick Pillay ki pou ganny premye slot le 16 Novanm, swivi par kandida PDM David Pierre e kandida SNP Wavel Ramkalawan menm zour, e Alexia Amesbury (SPSJD), James Michel (Parti Lepep) ek Philippe Boulle (kandida endepandan) son landemen le 17 Novanm.
Lord lezot PPB pou konm swivan :
Dezyenm slot : David Pierre ek Philippe Boulle (19 Novanm), Wavel Ramkalawan ek Patrick Pillay (20 Novanm), Alexia Amesbury ek James Michel (21 Novanm).
Trwazyenm slot : Philippe Boulle ek Alexia Amesbury (23 Novanm), David Pierre ek Patrick Pillay (24 Novanm), James Michel ek Wavel Ramkalawan (25 Novanm).
Katriyenm slot : David Pierre ek Philip Boulle (27 Novanm), Wavel Ramkalawan ek Alexia Amesbury (28 Novanm), James Michel ek Patrick Pillay (29 Novanm).
Tou kandida pou ganny en dernyen slot le 1er Desanm e i pou dan lord swivan: James Michel, Patrick Pillay, Alexia Amesbury, Wavel Ramkalawan, David Pierre e Philippe Boulle.
Bann kandida pou bezwen soumet zot progranm en zour avan ki i pou pase lo radyo ek televizyon.
En lot form kanpanny i bann bilbord avek lafis e portre bann kandida. Yer swar menm, aktivis serten bann parti politik in konmans met zot bilbord en pe partou lo bor semen parey bann portre ki swiv i montre.
