Follow us on:

Facebook Twitter LinkedIn YouTube

Archive -Seychelles

Ansyen prezidan Albert René i fet son 80enm lanniverser |17 November 2015

 

Ansyen prezidan France Albert René ti fet son lanniverser 80-an yer.

Parey tradisyon ki li menm i ti etabli depi ler i ti prezidan pei, Msye René ti fet son lanniverser avek bann dimoun aze yer apremidi. Sa ti dan en parti dan zarden ‘State House’; parti ki ti ofer par Prezidan Larepiblik Msye James Michel.

E parey in leka dan lepase, bann dimoun aze kot rezidans North East Point ti osi selebre sa lokazyon pli boner dan lazournen atraver en dezennen spesyal.

Parmi bann envite kot resepsyon State House ti Vis-Prezidan Danny Faure, bann minis, lezot o zofisye gouvernman, reprezantan distrik, fanmiy Msye René e plizyer lezot ankor.

Dan en pti diskour Prezidan Michel ti swet son predeseser en bon lanniverser. I ti dir ki sa lafet i an rekonesans travay ki bann dimoun aze in fer e i osi selebre lanmour ki Msye René ti annan pour bann dimoun aze konman prezidan.

« I ti pas son lanniverser avek bann dimoun aze akoz i pa ti egois e mazin zis son lekor,» Prezidan Michel ti dir.

I ti azoute ki lepep i remersye Msye René pour travay ki in fer pour anmenn sa pei kot i ete ozordi e pour lepanouisman tou Seselwa.

« Seselwa i selebre son lanniverser avek li e remersye li pour donn zot son lavi politik,» i ti dir.

Prezidan Michel ti osi remersye tou dimoun aze ki’n travay pour devlop pei e asire ki lazenes e zenerasyon fitir i ganny en meyer lavi e viv dan en pei kot i annan lape, stabilite, lanmour ek larmoni.

«Dimoun aze i bezwen ganny rekonnet pour sa kontribisyon ki zot in fer e ozordi zot devret ganny loportinite pour viv dan konfor ek dignite,” prezidan ti soulinyen.

Prezidan ti konklir par demann bann dimoun aze pour pas zot lasazes, leksperyans ek valer lavi avek bann zenn.

Msye René ti remersye son sikseser pour organiz en lafet pour bann dimoun ki’n travay dir e ki aprezan in ariv laz repo. I ti osi remersye gouvernman pour tou sa ki in fer pour bann dimoun aze.

Parti yer ti animen par group ‘Leve Tradisyon’ ek bann artis tel ki Jean-Marc Volcy, John Vital, Fred Savy ek Aaron Jean.

Prezan kot dezennen North East Point ti Minis pour Lasante Mitcy Larue ek son sekreter prensipal Peggy Vidot.

Dan en pti diskour, Minis Larue ti dir ki bann dimoun aze i pilye nou sosyete e zot in kontribye en kantite pour anmenn pei kot i ete ozordi.

“Nou vreman apresye tou sa ki zot in fer pour pei e sa dezennen i zis en fason pour dir zot mersi pour tou,” Minis Larue ti dir.

I ti osi demann bann manm fanmiy ek lezot dimoun pour fer letan pour vin vizit sa bann dimoun aze kot rezidans.

Ti osi annan kado pour Msye Rene sorti kot bann rezidan osi byen ki kado pour bann aze delapar Msye Rene.

Tou bann prezan ti sant en sanson lanniverser pour Msye Rene e swet li bonn sante.

 

 

 

» Back to Archive