Seremoni depoz kouronn fler i mark Lazournen Lafors Defans |26 November 2015

Trant kat-an pase, le 25 Novanm 1981, Sesel ti viktim en lagresyon par en bann mersener etranze, lagresyon ki ti ganny repouse par Lafors Defans Pep Sesel (SPDF).

Depi sa, le 25 Novanm i ganny selebre konman Lazournen Lafors Defans. Sa zour, SPDF i osi rann omaz son bann solda ki’n kit nou, sirtou Segon Lyetnan David Paul Antat ki ti mor dan konba kont bann mersener.

Parey i en tradisyon prezan, sa lazournen i marke par en seremoni depoz kouronn fler kot Erport Enternasyonal Pointe Larue, devan Moniman Laviktwar ki senboliz sa levennman.

Dan seremoni yer bomaten, sete sef lafors defans Brigadye Leopold Payet ki ti premye pour depoz kouronn fler. I ti swiv par sef deta mazor SPDF Lyetnan Kolonnel Michael Rosette, Konmisyoner Lapolis Ernest Quatre, konmandan bann diferan younit SPDF, lezot solda ek polisye, ensi ki reprezantan lazenes.

Seremoni ti osi enkli fer monte paviyon Sesel ki ti ganny salye par en gard doner, avek lakonpannyman Lim Nasyonal e lanmizik militer ki ti enterprete par Lorkes Nasyonal.

Per Katolik Colin Underwood ti priy pour bann dirizan pei e pour larme ek lapolis resevwar lasante ek lanmour pour ki zot kapab defann drwa imen tou Seselwa, enkli drwa a laliberte e boner.

I ti osi demann Bondye pour protez Sesel kont vyolans ek terorizm e demann tou Seselwa pour zwenn ansanm pour defann bann bon prensip ki nou pei i reprezante, sirtou fas a bann defi ki pe vini.

Apre seremoni tou bann ki’n pran par ti ralye devan sa moniman pour en portre souvenir parey nou portre lo premye paz i montre.