Lanmor ansyen minis David Joubert |26 November 2015

Prezidan Michel i anvoy mesaz kondoleans

Prezidan James Michel in anvoy en mesaz personnel Madanm Gemma Joubert, son zanfan ek manm zot fanmiy swivan lanmor Msye David Joubert yer.

Msye Joubert ti en minis dan gouvernman Premye Repiblik dirize par Msye James Mancham.

Prezidan Michel in eksprim son sagren letan i ti aprann lanmor Msye Joubert apre en long maladi.

“Menm si David ek mwan nou ti annan diferan ideolozi politik nou ti annan gran respe pour kanmarad,” Prezidan Michel i dir, an azoutan ki plizyer lannen apre zot ti vin zanmi.

Dan son mesaz, Prezidan Michel ti osi salye kontribisyon Msye David Joubert konman premye minis tourizm Sesel.

Prezidan Michel i termin son mesaz an ekspriman son senser kondoleans ensi ki kondoleans ek senpati gouvernman a Madanm Gemma Joubert, son zanfan ek tou manm son fanmiy.