David Pierre i termin son kanpanny dan distrik Mont Buxton |30 November 2015

Alor ki laplipar parti politik ti’n deside servi sa dernyen wikenn kanpanny pour fer zot bann dernyen miting ek rali, kandida PDM (Popular Democratic Movement) David Pierre ti deside vizit bann lakour e rankontre bann zabitan dan Victoria, sirtou dan distrik Mont Buxton.

Pandan sa bann vizit, Msye Pierre ti koz lo bann progranm ki son parti pou met an plas si i ganny eleksyon Sanmdi.

«Si ou fer en bon swa e vot pour PDM le 5 Desanm, le 5 Desanm tou ou problenm i rezourd,» Msye Pierre ti dir avek bann zabitan Mont Buxton.

I ti adres bann problenm ki i dir nou pei pe fer fas avek parey dan domenn ledikasyon, lasante, lekonomi, taks, bon gouvernans, lazenes, spor ek problenm drog, koripsyon, sekter piblik, partisipasyon sosyete sivil ek sekter prive ki i dir i devret vin moter lekonomi, pri lavi, taks, ek viktimizasyon.

Msye Pierre in promet pour rezourd tou sa bann problenm si i ganny elekte prezidan Sanmdi.

«Se sa bann rezon ki mon oule anmenn en sanzman dan nou pei,» i ti azoute.

I ti osi eksplike akoz i meyer kandida parmi sa sis ki pe konteste sa eleksyon:

«I sagrinan pour vwar ki dimoun i ankor per pour koz avek politisyen, akoz i per ki i a ganny viktimize. Akoz mon meyer? Se akoz mon pli ouver ki bann lezot kandida ek parti. Ler en dimoun i deside sorti dan mon parti, mon pa ensilte li. Mon pa anvi ki Seselwa i tir en diktatir rouz pour met en diktatir lot kouler. Dan sa ka, PDM is the best,» i ti dir.

Msye Pierre in osi demann bann voter pour pa vot pour en kandida zis akoz zot abitye vot pour li, me pour swazir sa ki meyer parmi sa sis.
 
«Mwan ki pli zenn parmi tou bann kandida. E mon kapab asir en meyer lavenir pour Sesel,» lider PDM ti konklir.