Kandida endepandan i termin son kanpanny avek «bann ki’n ganny neglize» |30 November 2015

Kandida endepandan Philip Boullé ti deside termin son kanpanny Lari Hangard, pli presizeman Roch Lane, Sanmdi apremidi.

Sa ti swiv miting ki sa kandida endepandan ti’n fer Anse Aux Pins ek Les Mamelles.

Msye Boullé ti pran letan pour eksplik bann ki ti’n vin ekout li lo lenportans en gouvernman linite nasyonal ki i pou met anplas si i ganny elekte.
 
I ti dir ki tou dimoun ki annan kapasite i devret ganny son plas dan gouvernman e non pa zis bann ki sorti dan parti ki ganny eleksyon.

Avek sa prensip ki in apel ‘meritokrasi’, Msye Boullé in anmenmtan donn lasirans ki bann dimoun ki aktyelman pe travay dan gouvernman pa pou perdi zot plas.
 
In plito ensiste ki fodre tir politik dan ladministrasyon e ki en dimoun i devret merit en louvraz dapre son kalifikasyon e non pa dapre son krwayans politik.

Msye Boullé ti osi koz lo progranm ki i pe ofer pep Seselwa, sirtou lo ledikasyon e lasante. I ti met lanfaz lo kalite avek ansennyan ek dokter kalifye e lopital byen ekipe ki a permet nou bann pasyan ganny sonnyen isi Sesel, olye pey en ta larzan pour al aletranze.

Dapre son kandida vis-prezidansyel, Peter Roselie, zot in deside pour pas dan bann landrwa ki zot santi in ganny neglize, kot bann zabitan in dekonekte, kot i annan plis problenm sosyal e kot lezot kandida prezidansyel ek politisyen pa pase. I ti azoute ki zot in anmenn Msye Boullé Roch Lane «kot bokou dimoun in ganny bate akoz zot lopinyon politik».

«Sel kandida ki’n vin vizit nou lo geto se Msye Boullé,» en siporter ti dir.

Enn bann problenm sosyal ki Msye Roselie i dir ki en gouvernman dirize par Msye Boullé pou konbat, se problenm drog.

«Dan tou sa bann parti politik se nou ki’n koz plis lo problenm eroin, etabli son sours e fer propozisyon pour solisyon. Nou bi se zwenn bann dimoun ki’n dekonekte. Parti Lepep pe sanz 14 MNA akoz zot in dekonekte avek popilasyon. Nou nou’n reisi netway geto e nou zwenn e viv avek sa bann dimoun. Dan bokou geto ki nou’n frekante i nepli annan dimoun ki pike. I nepli tan pour nou apel zot bann zonm ek fanm lapoud lo semen. Nou bezwen fer en zefor pour ed zot,» Msye Roselie ti dir.

I ti azoute ki pour rezourd problenm drog, plis lanfaz i devret lo prevansyon olye lo represyon.

«Letan nou pe get la, sa landrwa i prop, napa droger e napa NDEA. NDEA son plas pa devret lo geto me i devret pe vey nou lakot. Pandan 38-an, Parti Lepep in negliz Roch Lane e apel li en geto. Nou pa pou kapab les en bann dan geto e met lezot dan ‘Wall Street’, » i ti dir.

Msye Roselie ti koz lo lezot problenm ki Msye Boullé pou adrese letan i vin prezidan. Sa i enkli pri lavi ki tro ser, taks ki tro o, lafreyer ki pep Seselwa i viv ladan e prostitisyon ki i ti dir pa koze par zis eroin.

«Pa zis eroin ki koz prostitisyon. Sa bann ki al rod larzan ‘State House’ e dan biro, zot pa prostitye zot?,» Msye Roselie ti demande.

I ti osi koz lo nesesite pour lalit kont lenzistis. Par egzanp, i ti dir, serten dimoun ki deza annan later in ganny en nouvo bout lo Ile Soleil e ki en ansyen minis later ti fer kado son madanm en bout later pour son lanniverser.

I ti presize ki Msye Boullé pa en dimoun rasis parey serten in oule fer krwar, me ki i plito kont konportman serten etranze dan nou pei.

Kandida vis-prezidansyel Msye Boullé ti konklir ki «in ler pour fer sanzman pour sov nou nanm ».

I ti fer remarke ki bokou dimoun ki al rali Parti Lepep se bann siporter lopozisyon ki per viktimizasyon.

Letan in arive pour aret zwe rol e plito tir zot opouvwar,» i ti dir.

Jerry Sopha, enn bann aktivis Msye Boullé, ti dir avek bann zabitan Lari Hangard e Roch Lane ki zot ti’n ganny kit deryer e ki Msye Boullé pe montre zot ki zot osi zot annan zot plas dan sosyete.

I ti demann zot pour vot pour Msye Boullé akoz Parti Lepep napa nouvo progranm e ki sa parti in aksepte ki in fer erer e in dezespere.

«Prezidan Michel pe dir menm zafer ki i ti dir 5-an pase – donn li senk pour li fini son louvraz. Kan ki zot pou fini zot louvraz? Ki zot in fer depi 2005?» i ti demande.

«Parti Lepep pe ensilte dimoun lo medya e anvoy espyon pour vey nou. Sa i montre ki mannyer Parti Lepep i dezespere. Dapre zournal ‘Today’, Parti Lepep in aksepte ki in fer erer,» i ti dir.