Eleksyon Prezidansyel 2015 : Rali Lalyans Seselwa |30 November 2015

Patrick Pillay i dir i pou devwal plis koripsyon letan i vin opouvwar

Kandida prezidansyel parti Lalyans Seselwa Patrick Pillay in dir i pou devwal plis koripsyon letan i vin opouvwar.

I ti dir sa Sanmdi apremidi pandan en miting piblik Glacis ki ti asiste par plizyer son bann siporter. Sa ti dernyen rankont ki parti Lalyans Seselwa ti’n organize avan eleksyon prezidansyel ki pou fer le 3, 4 ek 5 Desanm.

Msye Pillay, en ansyen minis e anbasader dan gouvernman Parti Lepep, ti dir ki in nepli letan pour Seselwa annan lafreyer dan son prop pei.

« Mon kontan letan mon vwar bann Seselwa ki ti’n bezwen al viv aletranze zot in retourn Sesel pour vin partisip dan progre zot pei e fer biznes. Se sa ki nou oule dan Sesel. Kot tou Seselwa i partisipe aktivman akoz zot tou zot annan en rol pour zwe dan devlopman nou pei,» Msye Pillay ti dir.

I ti azoute ki depi son lansman an Me sa lannen Lalyans Seselwa in fer bokou progre.

«Nou ti konmans avek en pti group dimoun e set mwan plitar get distans ki nou’n arive. Si zis zot donn nou 5-an, mazinen ki kantite nou kapab fer,» Msye Pillay ti dir son bann siporter.

Msye Pillay ti dir ki bann difamasyon ki’n ganny ekri dan serten zournal pa fer li per e ki i reste pli for e pare pour anmenn sa lalit pour ankor pli lontan.