«SNP pou liber Sesel le 5 Desanm» |30 November 2015

«Lepep Seselwa in fatige avek diktatir ek viktimizasyon e le 5 Desanm nou pe al liber nou pei,» kandida prezidansyel Seychelles National Party (SNP) Msye Wavel Ramkalawan ti dir bann siporter sa parti yer pandan zot dernyen gran miting piblik ki ti fer lo laplenn Politeknik Anse Royale.

En gran lafoul siporter sorti partou lo Mahé ti mont Anse Royale yer pour sa gran randevou.

Msye Ramkalawan ti dir son bann siporter si ozordi in deside pour pran sa challenge e debout dan sa eleksyon se akoz in detrminen e i anvi vwar en sanzman.

«Mwan mon krwar dan lademokrasi me Parti Lepep i krwar dan diktatir,» Msye Ramkalawan ti dir.

I ti demann tou bann siporter SNP pour koz avek bann lezot dimoun nenport landrwa e eksplik zot akoz i enportan pour donn zot vot SNP ler zot al vote.

«I enportan ki nou donn nou pei sa nouvo konmansman sinon keksoz pou difisil pour nou pei e fodre ki nou met James Michel lo tapi,» Msye Ramkalawan ti dir bann siporter SNP.

I ti fer remarke ki avek en gouvernman SNP opouvwar swivan sa gran laviktwar ki i dir sa parti pe al gannyen le 6 Desanm, lafen dimwan Desanm tou bann dimoun ki ganny pansyon pou ganny zot 5 mil roupi e sa i pou zot kado Nwel.

Msye Ramkalawan ti fer rapel tou bann siporter e osi tou Seselwa an zeneral ki si SNP i ranport laviktwar dan sa eleksyon tou Selselwa pou retourn travay parey labitid e personn pa pou perdi son travay akoz SNP pa pou zanmen les Seselwa tonbe.

Lo son kote kandida vis-prezidansyel, Msye Roger Mancienne, ti dir SNP i annan en misyon pour akonplir dan sa eleksyon e sa se anmenn en sanzman gouvernman atraver bwat vote.

I dir Seselwa in pare pour donn SNP sans pour travay e le 6 Desanm SNP pou form en gouvernman solid e konpetan akoz i dir SNP I annan dimoun kapab pour fer sa.

«SNP i kapab fer otan e menm pli byen ki gouvernman Lepep pe fer. Mon demann zot pour servi zot pouvwar e pour fer sa sanzman ki Sesel i bezwen e pe espere,» Msye Mancienne ti demann bann siporter sa parti.

«Mon asire ki SNP pou ranport en gran laviktwar

 akoz SNP i kontan Sesel e Sesel i kontan SNP,» Msye Mancienne ti dir.

I ti fer resorti ki SNP pou anmenn en gouvernman linite nasyonal ki pou met Seselwa an premye dan son pei e ki donn li tou son drwa ki i merite, ki asir li en lavenir ki bon pour li ek son zanfan e ki rezourd bann problenm ki i fer fas avek toulezour.

Sa gran miting ti osi enkli sanson ek lanmizik par diferan santer ek mizisyen sa parti e osi ladres par diferan reprezantan.