Follow us on:

Facebook Twitter LinkedIn YouTube

Archive -Election

Eleksyon Prezidansyel 2015 : Rali Parti Lepep |30 November 2015

«Zot ti pe rod nou? La nou la !» Msye Michel i dir

«Zot ti pe rod nou? La nou la e ozordi nou’n penn lavil Victoria rouz. Mon vwar en losean rouz,» kandida Parti Lepep pour eleksyon prezidanseyl, James Michel, ti dir yer letan i ti pe adres siporter son parti dan Freedom Square.

«Nou tenm Together i zoli. Nou bann dimoun i zoli avek zot zoli sourir. Mon kontan zot en mon demann zot en dernyen manda 5-an,» i ti dir.

Ler i ti fer referans avek bann parti lopozisyon, Msye Michel ti dir «letan zot vwar nou pe travay, les nou travay. Letan zot vwar lyon pe dormi pa sifok li.»

I ti repete ki i pou knockout son bann oponan dan premye round e «anvoy zot lo tapi».

«Zot in rode zot a gannyen,» Msye Michel ti dir avan remersye son bann siporter ki ti’n desann pour montre lafors Parti Lepep, « sa parti lanmour ki’n pran son plas konman en parti pour tou Seselwa».

Msye Michel ti dir ki bann kandida lopozisyon napa Sesel aker, me zot annan zot prop lanbisyon e zis koz lalang akoz zot zis anvi tir James Michel ek Parti Lepep opouvwar, me lepep pou remet James Michel opouvwar.

Prezidan Michel ti sit plizyer rezon akoz serten dirizan lopozisyon i mekontan avek li e sa i ti dir se akoz i pa’n toler zot pour fer sa ki zot ti anvi fer san mazin lezot Seselwa.
I ti menm dir ki i pa pou perdi son letan pour vin fer deba lo televizyon avek bann kandida lopozisyon, me ki i a konsidere fer li si zot arive ranpli laplenn Freedom Square parey Parti Lepep in fer.

I ti azoute ki i annan detrwa ki dan lopozisyon ki ankor pe kasyet, me ki Seselwa dan son mazorite in dir zot sorti ale les lepep travay.

Msye Michel ti dir ki Sesel i en pei avek loportinite, stabilite, en pei ki lemonn i vwar konman en legzanp e pe demann nou pour vin eksplike ki mannyer nou’n fer pour ariv kot nou ete ozordi.

«Kontinyen fer mwan konfyans pour anmenn Sesel pli devan. Nou pou ansanm kre plis larises pour Sesel. Bann first time voters pa les personn vol zot lavenir. Donn mwan sa dernyen manda 5-an e zot lavenir i asire. Tou Seselwa i annan en par dan nou manifesto, dan sa Sesel ki nou kontan avek tou nou leker. Le 6 (Desanm) letan nou leve nou pou annan sa konfyans ki nou’n swazir bon semen – en semen lanmour, stabilite ek progre.

«Mon kontan zot. Vis-Prezidan Faure osi i travay dir e nou annan en lekip solid. Fer nou konfyans. Le 5 (Desanm) al fer sa bon desizyon e le 6 (Desanm) nou a fet laviktwar progre lo lanarsi, laverite lo mansonz,» Msye Michel ti dir.

Vis-Prezidan Faure ti lo son kote dir ki lalit SPUP/SPPF/Parti Lepep ti konmans dan Freedom Square (sa letan ti apel Gordon Sqaure) e ki nou dwa tou sa ki nou annan ozordi a nou bann gran papa ki’n lite.

I ti azoute ki parti Lalyans Seselwa i dir ki tou pou reste parey si zot vin opouvwar, e i ti demande akoz zot oule tir Parti Lepep ek James Michel opouvwar alors?
«Nou dan Parti Lepep nou pa vin zwe. Prezidan Michel in fer sitan bokou pour nou pei Sesel e pour tou Seselwa,» Vis-Prezidan Faure ti dir avan azoute ki «The Time is now pour nou met en fren avek lafoli grander lopozisyon e met zot lo tapi enn fwa pour tou ».

I ti azoute ki en parti politik pa kapab pran sabbatical leave apre vin rakont Seselwa mansonz e fer krwar tou keksoz pa bon.

 

 

 

» Back to Archive