Kanpanny pour dezyenm tour eleksyon |09 December 2015

Lapolis pou vin pli ferm kont bann move konportman

Minis pour Zafer Entern, Charles Bastienne, in lans lapel avek tou bann parti politik pour koz avek zot bann aktivis ek siporter pour fer sir ki zot respekte lord ek lalwa pandan bann aktivite ki ganny organize.

Minis ti dir sa dan en konferans avek lapres kot i ti dir ki pandan kanpanny pour eleksyon keksoz in deroul ase byen malgre ti annan dezord lannmen eleksyon.

“Mon krwar ki zeneralman piblik in konport zot tre byen, mon ekspekte ki bann sef parti politik in koz ek zot bann dimoun e sanmenm sa rezon ki nou ti vwar ki pandan kanpanny ek zour eleksyon tou keksoz in deroul byen dan lape e trankilite malgre ti annan enn de pti lensidan,” i ti dir.

I ti osi pran sa loportinite pour felisit lafors lapolis pandan sa peryod depi  ‘Nomination Day’ ki ti le 11 Novanm, ziska zour eleksyon ki ti le 5 Desanm.

“Lapolis in fer en tre bon travay e zot in organiz zot tre byen dan en fason profesyonnel pour fer sir ki nou’n vwar sa ki nou ti vwar ziska zour eleksyon,” i ti dir.

Minis ti fer resorti ki malerezman sa pa ti menm konportman ki ti deroule lannmen apre eleksyon le 6 Desanm.

“Le 6 Desanm lopozisyon ti’n ekri konmisyoner parey Public Assembly Act i demande konmkwa ki zot pe al fer en motorcade e malgre lalwa normalman i dir ki ou devret demann 5 zour davans, konmisyoner dan son desizyon, menm si ti menm zour, i ti donn zot permisyon pour zot fer zot motorcade,” i ti dir.

Deroulman sa motorcade pa ti neseserman al parey kondisyon konmisyoner ti’n met devan lorganizater sa aktivite dan lopozisyon.

Dapre kondisyon, sa motorcade ti sipoze konmans 1er apremidi en termin 6er diswar me nou’n vwar ki menm 8er edmi ti ankor annan motorcade ki ti pe kontinyen.

I ti azoute ki le 6 Desanm nou ti konmans vwar sitiasyon vyolans ki pe konmans devlope dan nou pei, sitiasyon kot dimoun in ganny atake e diferan aksyon ki a lenkonvenyans ek sekirite bann lezot dimoun lo semen.

Lannmen apre eleksyon in annan plis ki 60 lensidan ki’n ganny raporte par lapolis.

Minis Bastienne ti adres en lensidan ki ti arive Anse Aux Pins kot ex-Chetty Flat kot ti annan serten komosyon e letan lapolis ti entervenir sa zofisye lapolis ti ganny kou-d-ros.

Sa ti swiv par en lensidan Anse Boileau kot en dimoun ti pran en zenn fiy e bat li ater lo kort Anse Boileau.

Ti annan ankor plizyer lensidan dan Port Glaud, Au Cap parmi lezot landrwa e Minis Bastienne in dir ki sa pa akseptab e pa pou ganny tolere.

“Mon krwar ki nou tou nou anvi en Sesel ki trankil, nou tou nou anvi en Sesel ki annan stabilite e mon bezwen fer sir koman Minis pour Zafer Entern sekirite nou pep ek sekirite nou dimoun i toultan primordyal, nou pa kapab konpromet lo la,” i ti dir.

I’n demande ki bann organizater ek bann siporter bann parti politik i swiv e respekte bann kondisyon mete par konmisyoner e ki lapolis in toleran dan latmosfer politik malgre konportan Dimans ti enkyetan pour sekirite nou pei.

In dir ki lo nivo sekirite nou pei serten aksyon pa pou ganny tolere par lapolis espesyalman dan sa semenn ki vini dan dezyenm parti eleksyon e ki lapolis pou vin pli ferm dan bann zour ki pe vini.

Ti osi annan spekilasyon en lensidan kot en dimoun ti’n ganny pike, me minis ti klarifye e dir ki sa i en fo rimer.