Eleksyon Prezidansyel 2015 – Mini-rali Parti Lepep |12 December 2015

‘En vre kaptenn pa abandonn son lekipaz,’ Msye Michel i dir

En group santer Seselwa renonmen pe egey lafoul pandan rankont yer dan Sant Konferans Enternasyonal

«En vre kaptenn zanmen i abandonn son lekipaz. Zanmen i abandonn son pasaze. En vre lider zanmen i abandonn son pei – menm pandan moman pli difisil. En vre lider zanmen i bes son lebra devan sitiasyon oubyen keksoz ki pa touzour dan son faver. I aksepte defi e konn sirmont zot. I konfront ladversite e i transform li an loportinite.»

Se Msye James Michel, kandida Parti Lepep dan eleksyon prezidansyel, ki ti dir sa yer swar dan en rankont avek bann aktivis sa parti kot Sant Konferans Enternasyonal.

Sa rankont ti swiv par en mini-rali Perseverance.

Msye Michel ti pe koz avek son bann siporter dan kad son kanpanny dan dezyenm tour eleksyon prezidansyel ki pou fer le 16, 17 ek 18 Desanm.

Nou a rapel ki Msye Michel ti ganny 28,911 vot (47.76%) dan premye tour e kandida Seychelles National Party Wavel Ramkalawan ti ganny 21,391 vot (35.33%).

Msye Michel ti dir ki Sesel i bezwen lider konpetan, determinen, kouraze.

«Nou pei i bezwen lider ki annan leksperyans, ki mir, ki pa per pran desizyon – menm bann pli difisil. Vre lider sa pei – sel vre dirizan nou pei – i sorti dan Parti Lepep. E nou’n prouv sa. Parti Lepep pou donn nou pei dirizan ki Sesel i bezwen. Lider kredib ki nou merite. E nonpa bann fo lider avek zot fo promes,» Msye Michel ti dir.

I ti azoute ki sa semenn sa bann fo lider ki annan pretansyon pour diriz nou pei in devwal zot stratezi.

«SNP, ki realize ki i pa pou kapab zanmen anter Parti Lepep, in deside kree en nespes koalisyon pour challenge nou. Zot apel sa Linyon Sanzman. Me, pep Seselwa, pa les zot ganny anbete. Se pa sa swadizan Linyon Sanzman ki pe al konteste eleksyon. Se SNP e SNP tousel! Kat dirizan sa linyon divizyon in vann zot namm avek SNP. Se bann endividi avek zot lazanda personnel. Zot in trai sa pti git zot siporter ki’n ganny anbete pour vot pour zot. E zot siporter pe fer rebelyon ozordi. Akoz zot pa ti vot pour SNP. Zot pa pou vot pour SNP.

«E zot pa oule vwar en gouvernman SNP opouvwar,» Msye Michel ti azoute.

I ti fer remarke ki lopozisyon i zis anvi pouvwar. «Zot anvi pos dan gouvernman. Pour zot, se sa sanzman. Se sa sanzman ki zot anvi! Sa pa pou marse. Sa swadizan sanzman ki SNP pe rode i pli gran fo promes ki zot in zanmen fer avek pep Seselwa.

«Akoz? Akoz SNP, Linyon Sanzman – apel li ki mannyer ou anvi – pa pou zanmen kapab form okenn gouvernman.

«Premyerman, zot pa pou gannyen sa eleksyon. Akoz pep Seselwa pou rezet zot. Nou konnen ki enstabilite, vyolans, lamizer-nwanr, destriksyon ... pou rennyen anba en gouvernman SNP.

«Dezyenmman, eski SNP i vreman krwar ki zot pou kapab form en gouvernman ler zot napa reprezantasyon dan Lasanble Nasyonal? Dapre Konstitisyon Sesel, zis Lasanble Nasyonal ki kapab aprouv Konsey Minis. E konman nou tou nou konnen se nou, Parti Lepep, ki annan mazorite dan Lasanble. Nou en demokrasi vivan, e nou fyer nou demokrasi. Me si SNP i vin opouvwar i annan en danze reel ki nou demokrasi, bann lenstitisyon leta ek gouvernmantal pou ganny paralize totalman.

«Ki pou arive alors? Nou pou trouv nou dan en sitiasyon kaotik, anarsik, katastrofik. En sitiasyon enstabilite total. En sitiasyon kot pei napa en gouvernman, me zis en Prezidan ek en Vis-Prezidan. Zot de tousel pa pou kapab gouvern pei,» Msye Michel ti dir.

I ti azoute ki SNP i annan labitid fer fo promes san ki zot mezir konsekans, san dir lepep ki soufrans zot pou pas ladan.

«Parti Lepep pa fer fo promes. Mwan, mon pa fer fo promes. Mon koz laverite avek lepep. Touzour. Menm pandan bann moman pli difisil. Mon pa dir nou bann vye paran ki mon pou fer zot pansyon vin 7,000 roupi. Sa ti pou malonnet lo mon par. Nou mwayen, nou bidze, pa ankor permet nou fer sa. Me mon dir zot ki mon ava ogmant zot pansyon par 500 roupi toulezan e revwar sa sif ofiramezir ki nou sitiasyon ekonomik i amelyor ankor plis,» Msye Michel ti dir.

«Annou konsantre lo latas ki devan nou. Nou latas se pour nou ranport laviktwar dan sa eleksyon ki devan nou. E nou pou gannyen sa viktwar semenn prosenn. Mwan ek Vis-Prezidan (Danny) Faure, nou donn zot sa lasirans, sa garanti, ki laviktwar – en gran laviktwar – i pour nou, pour Parti Lepep, pour pep Seselwa, semenn prosenn. Me nou annan en travay serye ki nou bezwen fer. Nou tou nou bezwen vote.

«Pa les serten fristrasyon, serten mekontantman, anpes nou vot pour Parti Lepep. Mon konnen ki i annan serten febles striktirel e personnel dan distrik ki’n kree fristrasyon. Mon konnen ki i annan fristrasyon avek servis piblik ki’n dekouraz serten nou dimoun. Me mon donn zot sa lasirans ozordi. Mon pou elimin sa bann febles. Mon pou redres sitiasyon. Mon pou fer li ansanm avek zot. Annou pa detrir nou pei e esey rekonstrir li apre,» Msye Michel ti dir e ti menm demann bann aktivis pour al koz avek bann siporter ki pa’n vot pour Parti Lepep dernyen fwa.

Kandida Vis-Prezidan Danny Faure ti dir ki SNP ek lezot parti dan lopozisyon pe koz lo en divan ki pou anmenn movetan ki pou detri bann keksoz ki nou’n konstrir ansanm.

«Me nou, nou pe koz lo Together, Ansanm e sak fwa ki nou leker i bat ansanm i bon pour Sesel. Nou pe koz lo lavenir nou pei. Together i mesaz lanmour ki nou pe anmennen, en mesaz ki enspir sa zanfan 6-an, 8-an e 10-an pour ekrir en poenm. Parti Lepep se parti lanmour. Nou pa fer dimal personn. Se par sa bann prensip ki nou’n kapab anmenn Sesel pli devan,» Msye Faure ti dir e i ti demann bann siporter pour reste Together dan sa konba ki devan zot avan sant refren sanson ‘One Love’ par Bob Marley.

Pour Minis Tourizm ek Kiltir Alain St Ange, lepep in koze e Parti Lepep i bezwen ekoute e i ti dir ki tou Seselwa i bezwen defann son pei.

Msye St Ange ti dir ki SNP i en pti parti avek 35% vot e i asire ki bann dimoun ki pa ti vot pour Parti Lepep me plito vot pour Lalyans Seselwa pou safwasi vot pour Prezidan Michel.

I ti fer rapel ki sa maryaz ant SNP ek lezot parti dan lopozisyon pa pou dire e i ti fer rapel sa ki ti arive letan SNP ti zwenn avek Parti Demokratik e apre Msye Wavel Ramkalawan ti tir reprezantan Demokratik Msye Frank Elizabeth dan Lasanble Nasyonal.

«Prezidan i apwent bann dimoun dan en pos travayer pour en manda pour servi nou pei e ler i tir nou nou pa devret ankoler... Si Prezidan Michel pa ganny elekte pa li ki pou soufer, se pep Seselwa. Napa en keksoz pli onnet letan en prezidan i dir donn li en lot manda pour li termin son travay ki in konmanse. Nou bezwen al lo teren pour nou travay. Nou kapab fer li akoz nou annan en gro masin. Zis get sa  ki sa pti zil La Digue in fer dan premye round. I montre ki zot masin pe travay byen,» Msye St Ange ti dir.

Pour depite sekreter zeneral Parti Lepep Peter Sinon, letan Sesel ti ganny son lendepandans an 1976, 3% popilasyon ti posed 80% later dan Sesel, me ozordi 82% Seselwa i posed zot prop lakaz. E i ti azoute ki bokou dimoun pa kontan sa.

«Nou pou lager ziska dernyen gout disan. Zot pa pou pil lo nou. Zot a pike zot pa pou anbarke. Nou oule viv dan lape e dan sekirite,» Msye Sinon ti dir.