Eleksyon prezidansyel 2015 |14 December 2015

‘Nou annan en progranm lape,’ Msye Ramkalawan i dir

Lider Parti Nasyonal Seselwa (SNP) Wavel Ramkalawan in dir ki li ek sa ‘Linyon Sanzman’ kot trwa lezot lider lopozisyon in zwenn ansanm avek li pour konteste dezyenm tour eleksyon prezidansyel kont kandida Parti Lepep, James Michel, i annan en progranm lape, lazistis ek rekonsilyasyon.

In azoute ki menm bann siporter Parti Lepep pou annan zot plas dan Sesel letan sa linyon i vin o pouvwar e ki i pa pou fer parey in dir Parti Lepep in fer avek lepep Seselwa.

Msye Ramkalawan ti pe koz devan en gran lafoul siporter dan en rali yer lo Freedom Square, kot sa trwa lezot dirizan – Patrick Pillay (Lalyans Seselwa), Alexia Amesbury (Parti pour Lazistis Sosyal ek Demokrasi) e Philip Boullé (kandida endepandan dan premye tour) – kandida vis-prezidansyel Roger Mancienne e lezot lider lopozisyon ti osi prezan.

«Nou pou sanz nou pei e fer dimoun viv dan laliberte e fer Sesel retourn pour Seselwa,» Msye Ramkalawan ti dir an azoutan ki «Parti Lepep in bite dan son kanpanny lafreyer kot zot pe dir pou annan vyolans ek dezord». 

«Eski zot pe dir ki zot pou fer dezord ? Parti Lepep ki anvi fer dezord,» i ti dir, an azoutan ki se sa parti ki’n dezespere e pe zis ensilte e fer dimoun per. Tandi ki Linyon Sanzman, pe dir kwa ki i pou fer pour Seselwa.

Msye Ramkalawan ti demann Parti Lepep pour sorti trankilman an ka ki SNP ek Linyon Sanzman i ranport eleksyon.

«Dan sa pei pou napa okenn dezord. Larme ek Lapolis pa pou fer okenn dezord akoz zot pe rod sanzman zot osi. Pep Seselwa pa pou fer okenn vyolans akoz se pep Seselwa ki pou anmenn sanzman dan nou pei,» i ti dir.

Lider SNP ti azoute ki son lekip pou plito ranplas sa ki mal par sa ki byen e ki si Prezidan Michel ti pou fer sa ki in promet pour fer dan 100 zour, i ti annan ankor 213 zour dan son manda avan demande pour organiz nouvo eleksyon.

«Nou lo en misyon sakre akoz sa pou ranplas lemal avek sa ki byen. Nou pou met Bondye premye e fer li repran kontrol nou pei. Se nou lafwa ki pou fer nou sanz nou pei le 18 Desanm,» Msye Ramkalawan ti dir.

Sa kandida prezidansyel ti sepandan averti son bann siporter ki zot pa ankor fini ganny eleksyon. I ti demann sakenn antre zot pour «pandan sa kat zour ki reste, al koz avek en dimoun ki ankor siport Parti Lepep e fer li zwenn nou kan pour fer nou pei vin en pei laliberte, lazistis ek lape».

I ti menm azoute ki son lekip pe travay pour fer sa 52% ki zot ti gannyen dan premye tour «vin pli pre avek 60%».

«Kot nou’n arive nou pe al lager pour liber lepep Seselwa,» Msye Ramkalawan ti konklir.

Son kandida vis-prezidansyel Roger Mancienne ti osi fer resorti ki Parti Lepep pe fann fo propagann e senm lafreyer, me ki «lafreyer pou nepli marse».

I ti envit bann siporter Parti Lepep, enkli bann minis dan gouvernman aktyel, pour vin zwenn Linyon Sanzman «ki ozordi reprezant mazorite» e «akoz bann minis pe ganny blanmen pour keksoz ki’n al mal».

Parmi lezot lider lopozisyon ki ti koze, Msye Pillay ti dir ki zot in bezwen met en lafen avek sa larogans ki ti dir napa lopozisyon Sesel e i ti demann tou siporter Lalyans Seselwa pour fer konfyans Wavel Ramkalawan.

I ti azoute ki Sesel i ankor annan lamizer, viktimizasyon ek koripsyon, me ki Parti Lepep «pa pou kapab koronp nou tou».

I ti osi dir ki Lalyans Seselwa ek Linyon Sanzman i pardonn bann «ki’n anmenn en kanpanny sal e ki’n kol vyolans ek enstabilite lo ledo Linyon Sanzman».

Lo son kote, Msye Ahmed Afif ti oule asir dimoun ki an ka en viktwar Msye Ramkalawan dan dezyenm tour, i annan mwayen pour asir en bidze ki pou kontinyen fer marse pei atraver bidze siplemanter, e ki si Lasanble Nasyonal i refize aprouv bidze, prezidan pou kapab dizourd Lasanble.

I ti kalifye lezot alegasyon parey ki Air Seychelles pou fermen e ki Etihad e Emirates pou aret vin Sesel konman «mansonz».

Msye Boullé ti dir ki apre koudeta an 1977, bokou dimoun ti bezwen al viv aletranze akoz lafreyer. Sepandan in dir «bann ki’n reste deryer i touzour form en mazorite for».

Rali yer ti animen par bann santer parey Georges Payet, Peter Jules, Ras Ricky, David André, José Charles, Jany ek Mike Cedras.