Vote in konmanse dan dezyenm tour |17 December 2015

Vote dan 2enm tour eleksyon prezidansyel ti konmanse yer dan bann stasyon spesyal lo Mahé, Praslin, Silhouette e serten zil elwanye.

En total 70,943 voter in anrezistre pour vote dan sa 2enm tour eleksyon ki pe konteste par sa de kandida ki ti fer pli byen dan premye tour ki ti deroul ant le 3 e 5 Desanm. Sa i prezidan aktyel e dirizan Parti Lepep James Michel ki ti ranport 47.76% vot, e dirizan Parti Nasyonal Sesel (SNP) Wavel Ramkalawan ki ti ganny 35.33%.

Lo Mahé, le de pli gran stasyon spesyal ti Rivière Anglaise kot School Meal Centre pour bann travayer servis esansyel ki pou pe travay zour prensipal vote Vandredi e pour bann dimoun ki ti pou pe voyaze ant yer e Vandredi bomaten, e lo Zil Persévérance ki pa ankor vin en distrik elektoral. Sa i pou evite ki bann zabitan sa zil i fer deplasman pour al vot dan distrik kot zot in anrezistre. Sepandan, bann zabitan Persévérance ki pa’n vote yer, pou kapab al vote dan zot distrik respektif Vandredi si zot oule.

Sa de stasyon ti ouver ant 8er e 4er e en total 2001 dimoun ti’n anrezistre pour vote lo Zil Persévérance. Rivière Anglaise, en total 1,925 ti’n anrezistre.

Lot stasyon ki ti ouver ant 8er e 4er ti kot Lekol Primer Baie Sainte Anne Praslin pour bann dimoun ki normalman reste lo Mahé me ki an se moman pe travay Praslin, La Digue e lezot zil dan zalantour, parey Cousin, Cousine e Aride. En total 825 dimoun ti’n anrezistre laba e ti annan 684 ki ti vin vote.

Stasyon spesyal Silhouette ti ouver ant 9er e 1er pour sa apepre 100 dimoun ki an se moman pe reste lo sa zil e osi lo Ile du Nord. Vi ki nenport dimoun ki’n anrezistre ti kapab vote dan sa stasyon, serten dimoun sorti Mahé ti osi al vote laba. Finalman, ti annan 209 dimoun ki ti vot dan sa stasyon, konpare avek 194 ki ti vote laba dan premye tour.

Le de lot stasyon spesyal ki ti ouver ant 8er e midi ti kot Lospis ek Lopital Anse Nord-Est kot lo 156 dimoun ki ti’n anrezistre 112 ti vote, e Prizon Montagne Posée kot dan 130 deteni lo rimann 108 ti vote, enkli 12 madanm. Responsab sa stasyon Msye Douglas Accouche ti fer remarke ki ti annan menm kat deteni ki zot non pa ti lo lalis ki lotorite prizon ti’n fourni, me vi ki zot non i lo rezis voter, zot ti kapab vote. Par kont, senk pa ti kapab vote akoz zot non pa ti lo rezis.

Dapre Sef Sirentandan Prizon Maxime Tirant, ti responsabilite sa bann deteni zot menm pour asire ki zot non i lo lalis voter.

«Mon panse i zot responsabilite pour fer sir ki zot non i lo lalis. Zot ti’n kapab fer zot fanmiy tyeke. Lo kote prizon personn pa’n apros nou pour fer en tel demann,» Msye Tirant ti dir.
«Me apard sa tou keksoz in deroul byen,» i ti kanmenm azoute.

Bann travayer lo serten zil elwanye ti osi ganny sans vote yer. Sa ti lo zil Coetivy, Platte, Farquhar, Alphonse ek D’Arros.

Parey dan premye tour, tou dimoun ki’n vot dan sa bann stasyon spesyal ti vot dan lanvlop e sa bann lanvlop pou ganny garde an sekirite avan ganny transporte e konte dan zot distrik elektoral respektif Vandredi.

Tou bann responsab stasyon vote ki nou ti koz avek yer ti dir nou ki vote in zeneralman deroul byen e ki zot ti satisfe avek prosedir.

Nou ti kapab remarke ki kot ti annan bann pti difikilte o depar, bann responsab stasyon ti pran bann mezir pour fer vot pli vit.

Par egzanp, Rivière Anglaise kot lo konmansman ti pran letan pour verifye paspor e tiket avyon bann dimoun ki pe voyaze, responsab stasyon Msye Michel Mellie ti azout en latab spesyal pour sa santenn dimoun konsernen.

Fodre note ki 5,457dimoun ti’n anrezistre pour vote kot bann stasyon spesyal, e sa i 1,000 an plis konpare avek premye tour.

Komisyon Eleksyon ti eksplike ki azoute a bann dimoun ki ti pe voyaze, sa ti akoz bann anplwayer ti’n anrezistre plis zot bann anplwaye pour vote.

Nou ti osi konstat en bann lezot pti problenm. Par egzanp serten voter ki ti’n al vote Persévérance ti ganny anvoye Rivière Anglaise akoz zot anplwayer ti’n anrezistre zot non laba. E lo Silhouette, serten zenn ki fek ganny 18-an pa ti kapab vote akoz zot non pa lo lalis.

Lo son kote, pour de rezon pratik e sekirite, Komisyon Eleksyon in fer serten sanzman dan prosesis vote konpare avek premye tour. Lank i aprezan ganny mete lo pous kote gos olye lo lendeks e pour vote al pli vit, limero kart idantite voter pa ganny kriye parey avan.

Sef Zofisye Elektoral Msye Charles Morin in konfirmen ki vote yer in al dapre plan. Sa i dir malgre serten dimoun zot non pa ti lo lalis voter e osi serten konplent ki dimoun ti pe fer kanpanny dan laliny. Dan serten ka, lapolis in menm ganny demande pour entervenir kot i neseser.

Eleksyon yer ti deroul dan prezans bann obzervater etranze parey Kominote Devlopman Sid Lafrik (SADC), Commonwealth e Komisyon Losean Endyen (COI) ensi ki group obzervater lokal Citizens Democracy Watch Seychelles (CDWS) e Association for Rights, Information and Democracy (ARID) e osi reprezantan serten lanbasad etranze.

Le de kandida -- Msye Michel ek Msye Ramkalawan -- ti vizit bann stasyon lo Mahé, sof Prizon Montagne Posée kot zot reprezantan ti prezan. Msye Michel ti osi vizit stasyon lo Silhouette.

Vote i kontinyen ozordi lo sa bann zil swivan: Astove, Assumption, Aldabra, Marie-Louise, Rémire, Ile Aux Vaches, Denis, Frégate e Desroches.

Zour prensipal vote pou demen dan tou bann distrik elektoral lo Mahé, Praslin e La Digue. Komisyon Eleksyon in anonse ki avek bann nouvo mezir ki in met anplas, i ekspekte ki vote pou fini pli boner demen, konpare avek dan premye tour eleksyon. Komisyon pe osi demann tou voter pour kit stasyon vote apre ki zot in vote, e in fer rapel ki kanpanny kot stasyon i ilegal e sa ki koupab i kapab ganny pini anba lalwa.