Eleksyon Prezidansyel 2015 - Reaksyon bann kandida apre ki zot ti’n vote Vandredi |18 December 2015

 Le de kandida prezidansyel – Msye Michel ek Msye Ramkalawan – letan zot ti pe vote yer dan zot distrik respektiv

Sa de kandida ki ti debout dan sa dezyenm tour eleksyon prezidansyel – James Michel kandida Parti Lepep ek Wavel Ramkalawan kandida Seychelles National Party – ti al vote dan zot distrik elektoral yer.

Premye pour vote ti Msye Michel dan son distrik  Bel Air e sa ti ver 9er15 bomaten apre ki i ti’n fer letour dan nor pour pas dan bann stasyon vote.

Apre ki i ti’n fini vote i ti kontiny son parkour dan rezyon sid, was, Praslin ek La Digue parey i ti fer dan premye tour.

I ti dir ki in vwar en amelyorasyon dan lafason stasyon vote pe fonksyonnen e ki flow dan laliny i bokou pli byen e ki bokou dimoun in desann bomaten pour zot vote akoz swa i pli fasil sa voyaz vi ki i annan zis de kandida – James Alix Michel ek Wavel Ramkalawan.

Msye Michel ti demann tou dimoun pour aksepte rezilta eleksyon.

«Mon demann tou dimoun ek parti politik osi ki pe pran par dan eleksyon pour respekte rezilta ler i ganny anonse tanto akoz i enportan ki nou protez nou pei. I enportan ki i annan stabilite dan nou pei. I enportan ki i annan lape ki apre nou kontinyen travay e Seselwa osi i avanse e pas en bon Nwel ek Lannen,» Msye Michel ti dir.

Msye Ramkalawan li i ti vot St Louis ver 11er45 e son mesaz pa ti zis pour bann siporter lopozisyon ki limenm i pe reprezante anba Linyon Sanzman.

«Mesaz i pour lepep an antye ; annou tanto letan rezilta i ganny anonse pran li dan en fason kalm. Sa i nou pei, demen i mark en nouvo zour, annou pran li dan en fason kalm pour nou ini sa pep ansanm. Pou annan selebrasyon me akoz ki nou pa kapab lepep Seselwa selebre ansanm e mon ti ava kontan ki si tanto rezilta i dan faver lopozisyon ki lepep Seselwa rouz, ver, ble, zonn avek blan nou tou nou fer en selebrasyon pour lademokrasi Sesel. Annou fer nou pei sorti venker, annou pa rod en kouler politik pour sorti venker,» Msye Ramkalawan ti dir.

Msye Ramkalawan in fer letour dan nor kot bann stasyon vote kot i dir in vwar keksoz pe deroul tre byen.