Kouran i koupe lo Mahé apre ki dibwa i tonm lo laliny |19 December 2015

Kouran ti koupe Zedi apremidi lo Mahé antye apre ki pye dibwa ti tonm lo difil elektrik dan gran kontour Curio road.

Sa ti ariv dan rezyon St Louis ek Bel Air letan ki kontrakter ki Public Utilities Corporation (PUC) i fer koup bann brans dibwa ki pres avek difil elektrik ti pe koup brans dibwa.

Ler i ti koz avek zournalis Seychelles NATION ver 6er diswar Zedi dan landrwa kot son lekip ti pe repar difil ki ti’n ganny andomaze, sef egzekitif PUC Phillipe Morin ti dir ki PUC ti’n reisi etabli elektrisite dan laplipar landwra eksepte dan rezyon Bel Air, semen Curio ek St Louis. I ti azoute ki elektrisite ti pou ganny retabli dan sa rezyon plitar dan lannwit Zedi.

«Anviron 2er apremidi ti annan en tim kouper dibwa ki ti pe koup dibwa an realite pour anpes sa bann dibwa tonm lo laliny dan le fitir. Letan zot pe koup sa dibwa i resanble zot pa’n pran ase prekosyon e dibwa in tonm lo laliny e lefe ki sa laliny pa lwen avek stasyon kouran Nouvo Por, Victoria B e osi lefe ki sa trwa laliny in tous ansanm avek kanmarad i fot pli sever ki ou kapab ekspekte dan sistenm elektrisite,» Msye Morin ti dir.

Msye Morin i dir ki ler sa trwa difil i tous ansanm, in fer en collapse total dan voltaz dan rezo elektrisite e sa collapse in ariv sitan vit ki menm sistenm proteksyon pa’n ase rapid pour retir sa fot.

«Pandan sa pti moman ki sa problenm in arive vi ki sirkilasyon kouran dan laliny in sitan gro, par lefe magnetik in fors tou bann laliny pour zwenn ansanm e sa in fer zot clash e sa in ogmant severite sa fot ki fer voltaz dan rezo in collapse rapidman e sa in fer en blackout,» i ti azoute.

Msye Morin ti dir ki dapre en msye ki reste anba pres kot lensidan in arive, ler dibwa in tonbe in fer en masiv spark e in annan en gro dife lo laliny.

I ti dir ki i dezapwente avek sa lensidan e menm si i ti andeor zot kontrol i demann konsonmater en gran leskiz lefe ki zot in fer fas avek en kouran koupe sitan dramatik.

I ti fer resorti ki en lensidan parey ti arive pli boner sa lannen avan premye tour eleksyon prezidansyel.

«En dimoun ki ti pe travay obor batiman Caravelle House ti met en earth rod dan later e sa rod in ale e pik kab elektrik ki’n fer koup kouran partou dan lavil,» Msye Morin ti dir.