Ros Foret Noire i glis ankor, travay i konmanse pour kas li |11 January 2016

Swivan gro lapli ki’n kontinyen tonbe semenn pase, Vandredi swar sa gro ros ki pe menas serten zabitan Foret Noire ek Mont Fleuri depi lannen pase pandan menm sezon lapli, in glis ankor detrwa met.

Minis responsab pour devlopman kominoter, Msye Vincent Meriton, osi byen ki reprezantan bann lezot lazans konsernen ti lo teren Vandredi swar menm pour evalye sitiasyon e Sanmdi bomaten zot ti retournen pour koz avek bann zabitan  avan ki travay i konmanse pour kas sa ros.

Madanm Quincy Julie ek son fanmir in reste dan sa landrwa pour plis ki en ventenn lannen e ozordi i santi en gran menas ki zanmen i ti ekspekte par lao son lakaz.

Madanm Julie i dir Vandredi swar i ti antann en gro tapaz e apre en zonm ki ti pe pase ti kriy zot e demann zot pour sove akoz sa ros ti pe desann e li i ti zis kit lakaz e taye.

I dir ki si keksoz ti’n vin pli pir son pti garson ki ti pe dormi ti’n riske pri si son ser pa ti al lev li.

«Mon santi mwan enpe konsernen akoz mon krwar sa i en travay ki ti’n kapab amelyore. Me sa ki’n arive i travay Bon Dye e osi akoz problenm finansyel sa travay pa’n fer me si nou pe dir sekirite lavi nou bezwen fer li a tou pri,» Madanm Julie i dir.

I dir ki a en moman i ti’n kit son lakaz me travay pa’n konplete.

Nou a rapel ki travay pour stabiliz sa ros ti konmanse lannen pase me akoz plizyer lezot travay ki ti bezwen ganny fer apre ki dezas koze par movetan ti’n frap Foret Noire ek lezot landrwa, finansman pa ti permet pour konplet tou sa bann travay e  in fer ki demars pour kas sa ros pa’n al parey ti’n planifye.

Minis Meriton i dir ki kontra pour kas sa ros ti sinyen tar an Novanm lannen pase e deswit kontrakter in konmans travay.

«Erezman sa trou ki kontrakter in fouye in permet ki ler sa ros in roule in asiz ladan menm si menas i ankor la. Nou’n eksplik bann propriyeter ki nou pe al fer e ki mannyer travay pou deroule,» Minis Meriton ti eksplike.

I dir ki zot pou kas bout anler sa ros avan e apre kas li dousman dousman pour retir li konpletman. 

Minis Meriton ti donn langazman ki enzenyer sorti kot Minister Litilizasyon Later pe travay an kolaborasyon avek kontrakter pour asire ki travay i deroul byen.

Antretan Departman Zesyon Risk ek Dezas (DRDM) in dir ki apard enn ou de pti lensidan delo monte ek rigol bouse pa’n annan gran dega koze par lapli pandan sa semenn ki’n pase.

Portparol DRDM Regina Prosper in antretan demann dimoun pour kontinyen reste vizilan kot zot lakour, debous bann rigol e retir okenn lezot menas ki kapab vin en danze ler gro lapli i tonbe parey koup bann brans e tir salte ki kapab bous rigol e koz inondasyon.