Lamars protestasyon kont SBC |15 January 2016

Lider bann parti lopozisyon ki form par Linyon Sanzman ansanm avek zot bann siporter ti organiz en lamars protestasyon kont Seychelles Broadcasting Corporation (SBC) yer apremidi.

Lamars ti konmans dan car park Stad Popiler e al fini kot stasyon SBC Hermitage.

Avan ki lamars ti konmanse lider Seychelles National Party (SNP) Wavel Ramkalawan, lider Lalyans Seselwa Patrick Pillay, lider Seychelles Party for Social Justice and Democracy Alexia Amesbury ek kandida endepandan dan dernyen eleksyon prezidansyel Philippe Boullé, ti adres bann ki ti prezan.

Msye Boullé ti dir ki bann travayer SBC zot fer bann bon travay me malerezman direksyon ki pa bon.

I ti azoute ki zot pe travay «lanmen anmare» e ki fodre «larg zot lanmen» pour zot kapab pli byen fer zot louvraz.

Madanm Amesbury lo son kote ti fer resorti ki pa zis lopozisyon ki pa pe ganny tande me osi bann madanm.

I ti dir ki bann madanm fodre ganny en lavwa lo SBC.

Msye Pillay ti dir ki sa i «konmansman en lager pour laliberte» e ki zot «pa pou reste trankil».

I ti azoute ki sa lamars ki zot ti pe al fer i en premye e ki zot pou kontinyen ziska ki zot ganny tande.

Msye Ramkalawan ti dir i byen kontan pour vwar lakantite dimoun ki’n rasanble pandan en zour lasemenn e ki sa i montre «ki zot vreman determinen pour vwar sa sanzman».

I ti azoute ki sa i konmansman en lot letap «pour nou liber nou pep».

Sete anviron 4er ki lamars ti kit car park pour al Hermitage kot stasyon televizyon SBC i baze.

Lafoul ti ariv laba dan 4er20 avek antisipasyon pour tande ki bann sef anba Linyon Sanzman ti’n ekri dan en let adrese a tyermenn bord SBC Patrick Nanty ek son sef egzekitif Antoine Onezime.

Msye Ramkalawan ti lir konteni sa let andeor baro SBC avan ki bann sef anba Linyon Sanzman ti antre anndan pour al delivre sa let.

Sete sekreter Msye Onezime ki ti resevwar sa let e asir zot ki i pou delivre li avek dimoun konsernen.

Dan en intervyou Msye Ramkawalan ti dir ki bi sa lamars ti pour vin delivre sa let konplent kont SBC ki eksprim mekontantman lopozisyon avek lafason ki SBC in fer son travay pandan peryod eleksyon.

«Nou’n vwar a plizyer repriz kot SBC in montre lapreferans anver kandida Parti Lepep Msye Michel e menm dan moman ki nou ti’n fini rantre dan peryod cooling off  nou’n vwar SBC ki’n al kont prensip e zot in fer intervyou par egzanp avek Spiker Lasanble Nasyonal Patrick Herminie,» i ti dir.

I ti azoute ki tou le swar i annan prezans en minis dan News Extra pour adres bann topik politik an faver Parti Lepep.

Zot pe swete ki dan lespas de semenn i ava annan en rankont avek bord SBC pour zot kapab partaz zot pwennvi e si zanmen napa sa rankont Msye Ramkalawan ti dir zot pou fer en lot lamars.