Dwayenn Seselwa i ganny 107-an |27 January 2016

Madanm Nancy Marie ti ganny 107-an yer. Ne le 26 Zanvye 1909 Praslin, Madanm Marie i dwayenn Seselwa, setadir i pli vye dimoun dan Sesel.

I pou fet son laniverser dan en seremoni ki pou fer kot son lakour Vandredi.

Dan en pti intervyou ki i ti donn nou lannen pase alokazyon son 106enm laniverser, Madanm Marie ti dir nou son sekre pour viv lontan : manz mayok ek bannann bwi, pa bwar lalkol e pa fimen.

Madanm Marie ti koz avek nou pandan en pti moman yer. I ti dir nou ki pour li laz pa konte e ki i pa fatig li avek sa. Konmsi i ti pe andotmo dir ki i santi li ankor zenn !

Dan son zenes, Madanm Marie ti travay dan en kalorifer Praslin, avan ki i ti vin etabli Beau Vallon kot i ti travay konman en domestik. I an se moman pe reste Ma Joie.

Dan son lavi, Madanm Marie in ganny kat zanfan, de fiy ek de garson. I rapel ki i ti pre pour mor kan i ti ganny enn son garson preski 70-an pase. I ti telman malad ki per ti vin donn li lekstremonksyon. Me Bondye in beni li e sov li ki i ankor vivan ozordi.

Bonn aniverser Madanm Marie!