Linyon Sanzman ek SBC i eksprim satisfaksyon apre rankont |28 January 2016

Reprezantan Linyon Sanzman osi ki bord SBC (Seychelles Broadcasting Corporation) in tou le de kote eksprim satisfaksyon apre ki zot ti rankontre kot stasyon televizyon SBC Hermitage yer bomaten.

Sa rankont ki ti’n organize par SBC ti’n vin apre ki sa linyon ki reini trwa parti lopozisyon – Parti Nasyonal Seselwa (SNP), Lalyans Seselwa, Parti pour Lazistis Sosyal ek Lademokrasi (SPSJD) osi ki kandida endepandan dan dernyen eleksyon Philippe Boullé, ti’n proteste kont sa ki zot in apel lapreferans SBC pour parti opouvwar dan son bann progranm ek reportaz. Sa protestasyon ti’n vin dan laform en lamars ki bann siporter sa linyon ti fer ziska Hermitage le 14 sa mwan, kot zot ti osi remet en let avek direksyon SBC.

Dirizan SNP Wavel Ramkalawan ek direkter bord SBC Patrick Nanty in tou le de dir ki sa miting ti deroul dan en latmosfer kordyal e positif, e ki SBC in rekonnet ki i annan lespas pour amelyorasyon.

Kandida SNP dan dernyen eleksyon prezidansyel in azoute ki konplent Linyon Sanzman ti’n sirtou konsern konpozisyon bord SBC e lafason ki bann zournalis i travay, kot i santi ki sa televizyon ek radio nasyonal pa pe azir dapre son manda anba Konstitisyon, me pe plito eksprim pwennvi zis en kote.

«Nou pa’n dir SBC ekout lopozisyon. Nou’n demann li pour pas tou le de pwennvi. Nou anvi vwar reportaz rezonnab,» i ti dir.

Konman legzanp favoritizm SBC anver Parti Lepep, Msye Ramkalawan ti sit progranm ‘News Extra’ kot tou le swar en minis i vin prezant progranm gouvernman.

Msye Nanty in lo son kote dir ki SBC pe pran demann Linyon Sanzman “tre o serye” e ki an rezilta sa rankont, son bord pou zwenn pour vwar konman pour reazir.

In azoute ki SBC i konsyan lendepandans ki i devret garde dan kad son manda e  dapre bann lalwa, prensip e standar ki egziste.

« SBC i bezwen al an avan e sa i dan son benefis osi. SBC i selman kapab reste relevan e kredib si i donn lenformasyon ki balanse. I bezwen annan en fason pour al an avan. Nou swete ki nou pa bezwen kontinyen koze, me azir pour fer SBC al pli devan,» i ti dir.

Le de parti in dakor pour rezwenn dan en lot miting Zedi le 3 Mars.

Linyon Sanzman in eksprim lespwar ki apre sa dezyenm miting zot a kapab vwar sanzman pozitif dan fonksyonnman SBC.

Apard Msye Ramkalawan, son bann lezot reprezantan dan sa rankont ti Madanm Alexia Amesbury, Msye Ahmed Afif, Msye Peter Roselie, Madanm Ina Laporte ek Msye Wavel Woodcock.