Travayer SBC i met en dife dan zot lofis anba kontrol |05 February 2016
Bann travayer dan seksyon marketing kot SBC Hermitage ti yer bomaten azir vitman pour met anba kontrol en dife ki ti pe konmans pran dan enn zot lofis ziska ler bann zofisye Lazans Servis Tenny Dife ek Sovtaz ti arive.
Sa dife, ki ti kantmenm fer enpe dega dan sa lofis, ti afekte loperasyon labitid pour lazournen dan sa seksyon.
“Sa dife in afekte nou masin prensipal ki nou abitye fer nou travay toulezour lola e sa pou afekte enpe nou loperasyon me nou pe esper konsey avek nou tim teknik ek bann enzenyer pour gete si omwen nou kapab prepar nou travay pour tanto (yer swar) akoz travay ki nou fer lo sa masin se met ansanm bann diferan slots pour bann lavertisman ki pase lo televizyon dan aswar,” responsab seksyon marketing SBC, Manmzel Cindy Wirtz, ti eksplike.
I dir sa dife menm si i pa’n detri konpletman sa batiman, in koz en bon pe dega e avek loder lafimen ki reste ek netwayaz pour fer, SBC pe aprezan evalye domaz son bann lekipman e vwar ki mannyer pour reorganiz travay sa seksyon pandan sa bann prosen zour.
Zofisye relasyon piblik Lazans Servis Tenny Dife ek Sovtaz Msye Jones Madeleine lo son kote in dir ki erezman sa dife pa’n ariv dan lannwit ki fer ki domaz pa’n sitan grav akoz ti annan dimoun prezan ki’n azir atan.
Msye Madeleine ti eksplike ki sa dife in ariv atraver en extension ki’n sofe e prodwir laflanm ki’n pran avek rido e al bril en partisyon an plywood me erezman bann travayer in azir e servi lekipman apropriye pour tenny li.
“Bann staff kot SBC ti ganny en trening enpe letan pase e zot in servisa leksperyans pour servi en fire extinguisher ki pa’n kre danze e plis domaz avez zot bann lekipman,” Msye Madeleine i dir.
Msye Madeleine i dir kot dife in konmanse, en computer i reste ‘on’ e sa in fer sa dife konmanse e i montre lenportans tenny tou lekipman avan kit lofis.
I ti osi fer remarke ki en extension pa devret ganny servi konman en koneksyon permanan akoz i bann risk ki fer en overload lo sistenm e okazyonn dife.
