Petisyon kont rezilta eleksyon: Zafer pou ekoute ziska i fini |10 February 2016
Dan petisyon ki Msye Wavel Ramkalawan in anmennen an kour kont rezilta dezyenm tour eleksyon prezidansyel, kot Komisyon Eleksyon in deklar li perdan kont Prezidan James Michel, zafer pou kontinyen ziska ki i fini ekoute.
Se sa ki Lakour Konstitisyonnel in deside, apre ki bann avoka ladefans ti’n demande ki zafer i dismis akoz i pa ti’n fayle anba seksyon lalwa ki ti devret.
Sef Ziz Mathilda Twomey ki pe prezid sa zafer, in dir ki Lakour in rezerv son desizyon lo sa demann ziska ki zafer i fini ekoute.
Lezot de ziz ki pe asiz akote li i Ziz McKee ek Ziz Akiiki-Kiiza.
Dan sa zafer, Msye Ramkalawan in anmenn de petisyon kont biro Konmisyoner Eleksyon, Prezidan Michel limenm ek biro Prokirer Zeneral. I pe dir ki rezilta eleksyon pa valid akoz ti annan iregilarite e ki dapre bann vot ki’n anrezistre – e non pa bann vot valid – Msye Michel pa’n ganny plis ki 50% ki permet li ganny deklare prezidan.
Dapre sa bann avoka -- Samantha Aglae pour Konmisyoner Eleksyon, Basil Hoareau ek Laura Valabjhi pour Prezidan Michel, e Prokirer Zeneral Ronny Govinden ki pe reprezant son biro, sa petisyon ti’n devret ganny anmennen anba Lartik 130 Konstitisyon e non pa anba Lartik 51. Otreman, zot largiman sete ki rezilta eleksyon ti’n devret ganny konteste par en petisyon eleksyon e non par en petisyon konstitisyonnel.
Zot ti azoute ki anba Lartik 130, Lakour Konstitisyonnel napa zirisdiksyon pour deklare ki prezidan in ganny elekte ilegalman, e donk fer eleksyon al dan en trwazyenm tour.
«Prosedir in ganny abize e pa kapab annan zirisdiksyon,» Prokirer Zeneral ti par egzanp plede.
I ti azoute ki si sa petisyon i ganny aksepte, i pou kre en move presedans e Konstitisyon pa pou ganny respekte.
Msye ek Madanm Bernard Georges ki pe reprezant Msye Ramkalawan, ti lo zot kote reponn ki i kler ki zot in prezant en petisyon eleksyon, me ki pe rod en lenterpretasyon Konstitisyon lo vot ki’n anrezistre dan eleksyon. Zot ti azoute ki pour zot, eleksyon pa ankor fini akoz vot in mal konte an rezilta en move lenterpretasyon Konstitisyon.
«Sel fason pour montre ki vot in mal konte se atraver sa petisyon,» Msye Georges ti dir.
Zafer petisyon eleksyon in anvoye pour Lendi, 9er bomaten. Sa i akoz se sa zour ki Lakour pou donn en desizyon lo si Prokirer Zeneral pou reste dan sa zafer ou non. Sa in vin apre en demann bann avoka Msye Ramkalawan ki dir ki akoz Msye Govinden in klerman dir ki i pe siport Prezidan Michel ek Konmisyoner Eleksyon dan sa zafer, i pa enparsyel e in pran en pozisyon partizan.
Msye Govinden in lo son kote argimante ki sa aplikasyon i bezwen dismis, akoz i pa baze lo okenn pwen lalwa e ki sete Msye Ramkalawan limenm ki’n anmenn li dan sa zafer.
In azoute ki dan sa mosyon, Konstitisyon in ganny mal enterprete lo drwa ek privilez Prokirer Zeneral, osi ki son lendepandans pour pran en pozisyon baze lo lalwa ek fe.
Msye Ramkalawan in osi fayle en zafer kont Lazans Proteksyon Sosyal, kot i pe dir ki sa lazans in enplike dan pratik ilegal. Sa i akoz dapre li, dan bann zour avan eleksyon, Lazans Servis Sosyal in donn larzan dimoun ki pa ti sipoze gannyen.
Lakour Konstitisyonnel pou donn en verdik le 15 Fevriye dan sa enn zafer.