Lasanble pou konsider lalwa pour redwir manda prezidan a selman 2 term 5-an |17 February 2016

Lasanble Nasyonal pou byento konsider en lalwa ki gouvernman pe propoze pour redwir manda prezidan sorti 3 term 5-an konsekitif parey i leka konmela pour vin 2 term 5-an selman.

Prezidan James Michel ti dir sa letan i ti pe pronons diskour lo letalanasyon devan Lasanble Nayonal yer apremidi.

I dir ki sa kestyon i bezwen ganny konsidere akoz nou demokrasi pe kontinyen evolye.

Lalit kont trafiker drog pou entansifye e sa lannen plis lanfaz pou mete lo  Proceeds of Crime Act (POCA), en lalwa ki obliz bann trafiker drog pour zistifye sours zot bann byen sinon Leta pou konfiske.

I ti dir ki aktyelman FIU an kolaborasyon avek NDEA ek lapolis pe pran aksyon kont 8 endividi anba sa lalwa.

Prezidan Michel i dir ki trafik ek labi drog i reste enn bann priyorite son gouvernman ki reklanm en desizyon ferm ek en latansyon irzan.

Touzour an sa ki konsern lalwa, Prezidan Michel i dir i annan bokou lezot ki Lasanble Nasyonal i bezwen konsidere tel parey serten dan nou Kod Kriminel ki nepli fer sans ozordi.

“Enn sa lalwa ki Angle ti entrodwir an 1955 pour kriminaliz omoseksyalite,” i ti eksplike.

I ti fer remarke ki i pa normal ki sa lalwa ki menm si i pa pe ganny aplike denozour i ankor reste dan nou sistenm legal.