Follow us on:

Facebook Twitter LinkedIn YouTube

Archive -Election

Petisyon kont rezilta eleksyon: |29 March 2016

Verdikt le 31 Me

Se Mardi le 31 Me 9er bomaten ki Lakour Konstitisyonnel pou rann zizman dan zafer petisyon kont rezilta eleksyon prezidansyel ki ti fer an Desanm 2015.

Dan sa petisyon, kandida perdan Wavel Ramkalawan pe konteste rezilta eleksyon lo de baz – konmkwa ki kandida gannyan James Michel pa ti ganny plis ki 50% vot dan 2enm tour pour fer li ganny deklare prezidan e ki ti annan iregilarite dan prosedir eleksyon.

Se prezidan sa lakour, Sef Ziz Mathilda Twomey ki ti donn sa dat zizman yer bomaten, apre ki li ek son de koleg – Ziz McKee e Akiiki Kiiza – ti’n ekout dernyen prezantasyon bann avoka. Azoute avek zot depozisyon an ekri, zot ti’n ganny sakenn 15 minit pour adres Lakour.

Apard Prezidan Michel, Msye Ramkalawan in dan sa zafer osi pourswiv Biro Prokirer Zeneral ek Komisyonner Eleksyon.

Le trwa avoka ki pe siksesivman reprezant sa trwa parti – Basil Hoareau, Samantha Aglae ek Prokirer Zeneral Rony Govinden – in dir ki napa levidans pour siport sa 15 lenstans iregilarite ki zot koleg Bernard Georges in anmennen an faver Msye Ramkalawan. Sa i prensipalman ki serten voter ti’n vann zot kart idantite, lank ek spray ki ti met lo ledwa pa ti bon, dan serten distrik lakantite voter pa ti koresponn avek lakantite papye vote e non dimoun lo rezis voter, Lazans Proteksyon Sosyal (ASP) ti donn larzan san zistifikasyon, distribisyon larzan lo zil Perseverance, travayer Indian Ocean Tuna (IOT) ek serten solda ek ansennyan ti ganny entimide pour vot pour Msye Michel akoz zot ti ganny dir ki otreman zot pa pou resevwar zot saler apartir lafen dimwan Fevriye e osi lentimidasyon dan serten distrik.

Msye Georges in osi prezant lezot ka lenflians parey menas pour Etihad aret vin Sesel e pardon san zistifikasyon pour en prizonyen.

Dan zot lesey pour kas sa bann largiman, bann avoka ladefans in donn legzanp parey kot si en msye ti pe asiz devan dan linogirasyon prezidan, sa pa ase pour prouve ki i ti’n aste kart idantite. Ni lefe ki ansyen prezidan Albert Rene ti’n telefonn lider Lalyans Seselwa Patrick Pillay, ki ti alye Msye Ramkalawan dan 2enm tour. Osi, zis en temwen ki ti’n dir lank ek spray ki ti mark ledwa pa ti bon e ti efas fasilman, alor ki pour zot sa de komodite i sorti kot en fourniser sir. Dan ka ki petisyonner in dir ki ASP ti ekrir dimoun pour demann zot pour vin sers larzan, zot dir ki napa okenn let ki’n prezante an kour konman levidans.

Zot in plito soulinyen ki dan en ka sivil parey petisyon kont rezilta eleksyon, fodre annan «levidans pozitiv san okenn dout» e «non pa persepsyon». Zot in donk ensiste ki eleksyon in deroul dapre lalwa e ki i’n napa move lentansyon de lapar personn, e napa laprev ki bann azan konsernen in ganny demande pour azir an faver repondan. Si in annan fot zot dir, sa se bann erer imen ki pa’n ganny fer par ekspre e ki dapre zot, pa’n ase pour afekte rezilta eleksyon.

Le trwa avoka in azoute ki ti annan sifizaman mezir anplas pour asire ki eleksyon i valid. Par egzanp, en mark kot non en dimoun ler son non i ganny kriye pour li pa vot de fwa. Apard lefe ki rezilta ti pre, zot dir napa tandans ki montre iregilarite e ki sa pa ase pour ki vot i rekonte.

Msye Georges in reponn ki i pa depan lo petisyonner pour prouv son ka, me ki i plito depan lo lakour pour deside. Dan sa ka, i dir, i annan sifizaman lensertitid pour lakour desid lo la.

In azoute ki i annan diferan distrik parey Anse Aux Pins, Cascade ek Zil Pros kot bann iregilarite in kapab sanz rezilta eleksyon.

«Laprev bann pratik ilegal tousel i sifizan. Laprev en pratik ilegal dan limenm i ase pour prouve ki rezilta eleksyon pa kredib,» Msye Georges in dir.

Pour esey prouv zot ka, tou le de kote in sit lezot kontestasyon rezilta eleksyon ki’n arive dan bann pei Commonwealth. Sa in enkli kont Rajiv Ghandhi an Lenn, Anerood Jugnauth Moris ek Uhuru Kenyatta Kenya.

Sef Ziz Twomey, ki’n dir ki sa zafer pou mark listwar zidisyer Sesel, ti regilyerman enteronp bann avoka pour poz kestyon e fer serten remark. Par egzanp, ki petisyonner ti annan zis de semenn pour fayle son ka e ki i ti napa akse avek serten levidans e si ou aste kart idantite en dimoun, sa i anpes li vote. Eski sa i kapab donn en lendikasyon lo verdikt ki lakour i kapab delivre ? Lepep Seselwa pou reste enpasyan ziska le 31 Me pour konnen.

Antretan, avoka tou le de parti in eksprim zot konfidans dan en rezilta dan faver zot kliyan. Zot in osi azoute ki zot krwar ki nenport ki verdikt pou kre en presedans e sanz lafason ki eleksyon i organize Sesel dan lavenir.

 

 

 

 

 

» Back to Archive