Follow us on:

Facebook Twitter LinkedIn YouTube

Archive -Politics

«Napa lentansyon malisye deryer Linyon Sanzman,» Martin Aglaé i dir |07 April 2016

Motivasyon Linyon Sanzman, en nouvo parti politik ki’n anrezistre, se pour travay avek lezot parti lopozisyon pour retir Parti Lepep o pouvwar.

Se lider sa parti Martin Aglae ki’n dir sa pandan en konferans de pres yer bomaten.

Msye Aglae in azoute ki kontrerman a sa ki serten dimoun i kwar, desizyon pour anrezistre sa parti anba sa non pa’n ganny pran avek en lentansyon malisye kont lezot lider lopozisyon ki ti zwenn avek dirizan SNP (Seychelles National Party) Wavel Ramkalawan, pour konteste dezyenm tour eleksyon prezidansyel an Desanm lannen pase. Sa ti Msye Patrick Pillay (Lalyans Seselwa), Madanm Alexia Amesbury (Parti Seselwa pour Lazistis Sosyal ek Lademokrasi – SPSJD) e kandida endepandan Philippe Boullé.

Msye Aglae in plito dir ki i annan lentansyon pour ralye lezot parti lopozisyon anba sa platform Linyon Sanzman ki li i dirize.

In azoute ki desizyon sa parti pa malisye akoz dapre li sa lot Linyon Sanzman i ilegal akoz i pa’n anrezistre ofisyelman.

Me in kanmenm konteste leadership SNP anba Msye Wavel Ramkalawan, ki i dir pa anvi tir Parti Lepep o pouvwar. I’n plito fer resorti ki i pa pou aksepte sa politisyen dan sa nouvo Linyon Sanzman. Sa menm si en zournalis ti fer li rapel ki lider SNP ti ganny preski 50% vot dan dernyen eleksyon.

Lo kestyon si lezot parti lopozisyon pou rekonnet oubyen afilye zot avek sa Linyon Sanzman, Msye Aglae in dir ki son parti i an se moman an konsiltasyon ek negosiasyon avek omwen en lot parti politik.

Menm si in limenm ganny akize konman pa stab dan politik akoz in sanz parti plizyer fwa, i azoute ki i kwar ki i annan sa lafors e abilite pour diriz en linyon lopozisyon. Sa i menm si i limenm fer rapel ki i ti ganny zis 73 vot kan i ti debout konman kandida Popular Democratic Movement (PDM) pour bann zil pros dan en eleksyon lezislativ.

Menm si i osi dakor ki i annan en konfizyon parmi piblik lo lekel vre Linyon Sanzman, Msye Aglae i ensiste ki se pa li ki’n kre sa konfizyon, akoz parey i ankor repete, sa lot pa’n anrezistre e i dapre li ilegal.

Msye Aglae in osi deklare ki i pe an se moman finans Linyon Sanzman limenm, e ki konpare avek sa ki serten pe spekile, sa parti pa pe fonksyonn anba lenflians okenn lot parti politik.

 

 

 

 

 

 

» Back to Archive