Dapre lalwa, Komisyon Eleksyon ti oblize anrezistre Linyon Sanzman |09 April 2016

Dapre lalwa eleksyon, Komisyon Eleksyon ti oblize anrezistre Linyon Sanzman parey in fer li, akoz se Msye Martin Aglae ki ti premye pour fer laplikasyon pour anrezistre sa parti politik.

Sa i menm si sa lalyans bann parti lopozisyon ki ti siport kandida Wavel Ramkalawan dan dezyenm tour eleksyon prezidansyel an Desanm, ti fer li anba sa non.

Se konseye legal Komisyon Eleksyon Samantha Aglaé ki ti donn sa klarifikasyon, apre ki lanrezistreman sa nouvo parti politik ti’n sanble anmenn serten konfizyon. Sa avoka ti pe koz avek lapres yer apremidi kot biro Komisyon Elektoral dan batiman Bibliotek Nasyonal, dan prezans tyermenn sa komisyon Hendrick Gappy.

«Biro eleksyon in bezwen aksepte sa ki’n soumet son laplikasyon avan. Vi ki Lalyans Seselwa ti reponn a tou kriter pour anrezistre en parti politik, biro Komisyon Eleksyon ti aksepte son laplikasyon,» i ti dir.

I ti azoute ki avan sa komisyon ti fer sa, i ti rod konfirmasyon avek biro Rezistrar Zeneral ki okenn lot dimoun pa ti’n anrezistre sa non, e ti osi demann konsey avek Prokirer Zeneral.

Avoka Aglae ti eksplike ki sa group ki ti premye pour servi non Linyon ti soumet zot laplikasyon menm zour, le 10 Mars 2016, atraver zot reprezantan Roger Mancienne.  Me, ki zot ti fer li apremidi, konpare a Msye Aglae ki ti depoz son form bomaten. Sa i menm si i dir ki Msye Mancienne ti’n pran form laplikasyon depi an Zanvye sa lannen.

Manmzel Aglae i dir ki menm si Komisyon Eleksyon pa ti pou kapab anpes Msye Aglae anrezistre Linyon Sanzman, i ti par kourtwazi enform Msye Mancienne ki en lot group dimoun ti annan lentansyon anrezistre en parti politik anba sa non. I azoute ki avan menm ki komisyon ti’n pran en desizyon, Msye Mancienne ti fer laplikasyon pour anrezistre son parti anba en lot non, ‘Linyon 2015’. Me Komisyon Elektoral ti refiz sa «akoz sa non ti tro pre avek Linyon Sanzman e ti pou kapab anmenn serten konfizyon».

Finalman, Komisyon Eleksyon i dir ki i ti aksepte non Linyon Demokratik Seselwa ki’n depi Zedi anrezistre konman en nouvo parti politik.

Apard son tyermenn Roger Mancienne, sekreter zeneral Linyon Demokratik Seselwa i Clifford Andre e son trezorye i Roy Fonseka.