LDS pe finaliz son lalis kandida pour eleksyon Lasanble Nasyonal |13 April 2016

Linyon Demokratik Seselwa pe finaliz son lalis kandida pour prosen eleksyon Lasanble Nasyonal.

Sa trwa parti politik ki’n regroupe pour form sa linyon – Parti Nasyonal Seselwa (SNP),  Lalyans Seselwa (LS), Parti Seselwa pour Lazistis Sosyal ek Demokrasi (SPSJD) – ensi ki kandida endepandan dan dernyen eleksyon prezidansyel Philippe Boulle, pe an se moman diskite pour kapab swazir meyer kandida pour sak distrik.

Se dirizan sa nouvo parti politik Linyon Demokratik Seselwa (LDS) Roger Mancienne ki ti fer sa deklarasyon letan i ti pe koz avek lapres kot biro SNP Arpent Vert yer bomaten.

Osi prezan dan sa konferans de pres ti sekreter LDS Clifford André ek son trezorye Roy Fonseka.

Nou a rapel ki sa trwa parti ki’n form LDS ti zwenn avek Msye Boullé pour ralye deryer kandida perdan Wavel Ramkalawan dan dezyenm tour eleksyon prezidansyel ki ti fer an Desanm lannen pase. Zot ti fer sa anba en lot platform apele Linyon Sanzman.

«Ler i annan kat parti ki enplike, ou ekspekte ki i kapab pran letan pour diskite e idantifye le meyer kandida ki pou reprezant nou,» Msye Mancienne ti fer resorti.

I ti kanmenm azoute ki sa parti i santi ki i pou annan ase letan pour prepar li e fer kanpanny pour eleksyon Lasanble Nasyonal ki pou fer plitar sa lannen.

Menm si i ti ankor ensiste ki Msye Martin Aglaé in anrezistre en parti politik anba sa non Linyon Sanzman pour kre konfizyon dan lespri Seselwa, Msye Mancienne i reste konfyan ki sa konfizyon pa pou aparet lo papye vote. Sa i akoz lo papye vote i annan non bann kandida e kouler osi ki senbol zot parti.

«I annan ase diferans lo papye vote pour asire ki voter i swazir son kandida ki i anvi,» i ti dir.

Sepandan, in osi dir ki sa parti pou antreprann diskisyon avek Komisyon Eleksyon pour revwar serten regilasyon ek prosesis eleksyon pour asire ki zot an konformite avek lalwa. Sa i konsern par egzanp sitiasyon Zil Persévérance konman en nouvo distrik elektoral.

LDS ti osi profit sa konferans de pres pour donn bann grann liny filozofi sa parti. Sa son bann lider i dir i par egzanp bon gouvernans avek bon travay bann minister e kontrol lo depans gouvernman, lalit kont trafik drog ek en bon servis piblik.

Msye Mancienne in osi eksprim lentansyon sa trwa parti politik ki form lalyans LDS pour vin en sel parti plitar.

In osi dir ki menm si lapartenans non Linyon Sanzman i kapab ganny konteste an kour, sa groupman parti politik ki i dirize pa pou servi sa non ankor.

«Nou’n anrezistre Linyon Demokratik Seselwa pour nou al an avan,» i ti konklir.