Sen Joseph i devret en legzanp model pour tou travayer |03 May 2016

Tou zouvriye ek travayer i devret pran Sen Joseph koman en legzanp model e travay dir dan en fason onnet e nob pour ganny zot lavi e osi pour sonny zot fanmir, dirizan Legliz Katolik Monsenyer Denis Wiehe ti dir Dimans le 1e Me alokazyon Lafet Travayer.

Parey toulezan en gran lafoul pelren sorti dan kat kwen Mahe ti  vin legliz Sen Joseph Anse Royale pour sa lafet kot zot vin rod benediksyon ek lagras dan zot travay, pour zot fanmir. Bann ki napa en lanplwa i osi vin priye pour ganny en travay.

Vis-Prezidan Danny Faure, Minis Pour Lanplwa ek Devlopman Resours Imen Idith Alexander, lezot minis e o zofisye gouvernman ti osi asiste sa lanmes.

Dan son lomeli, Monsenyer Wiehe ti salye e remersye tou bann dimoun ki dan lemonn travay e pe travay dir toulezour pour ganny zot lavi e sa ki pour zot fanmir, pour ogmant larises e fer progrese lekonomi nou pei. I ti dir ki par zot travay dir zot pe osi donn valer zot lavi imen. I ti demann zot pour kontinyen swiv legzanp Sen Joseph, sa zouvriye ki ti travay dir pour fer en louvraz nob koman en sarpantye pour sonny Zezi (Jésus) avek son manman Marie.

«Sen Joseph zouvriye i patron parwas Anse Royale e osi Grand Anse Praslin me osi patron tou bann zouvriye ek travayer. Ozordi nou pe priy Sen Joseph e demann li pour vey lo nou parwas ek tou bann travayer, pour beni nou travay e fer ki sak dimoun i kapab ganny en travay dinny e onnet,» Monsenyer ti dir.

Baze lo lektir pour sa zour ki ti lo la kreasyon tire dan Liv La Zenez, Monsenyer ti fer remarke ki depi okonsman lemonn, ti annan sinny ki ti annan en bon relasyon ant zonm ek Bondye letan Bondye ti kre zonm e met li o milye en zarden pour kiltiv later e gard li byen.

«Alor travay dan lide Bondye i pa en pinisyon me en kolaborasyon zonm avek Bondye. Travay i en aksyon nob e par nou travay nou kolabor avek Bondye dan travay kreasyon pour fer later port fri e anbelir lanatir avek lanvironnman», Monsenyer ti eksplike.

Monsenyer ti dir ki Sen Joseph i osi en model perdfanmir pour tou fanmir akoz son fanmir an Nazareth  ti enn kot ti annan lanmour kot Zezi ti grandi e aprann fer sarpantye li osi.

«Dan son latelye Nazareth, Joseph in aprann ki dan tou travay i annan lazwa me osi soufrans e ki sak dimoun ki fer byen son travay i servi byen  lakominote e anmenmtan vin pli pros avek Senyer nou kreater», Monsenyer Wiehe ti  fer resorti.

A lokazyon sa 1e Me Monsenyer ti fer rapel tou bann ki ti prezan serten laspe enportan travay – son valer pour sak imen e osi son rol ek son lenportans dan sosyete.

«Pour devlope koman imen, fanm ek zonm i devret kapab travay akoz Bondye ti travay pour donn nou lemonn ek later atraver lakreasyon. Travay in ganny fer pour zonm me zonm pa devret vin lesklav travay, » Monsenyer ti dir.

I ti demann tou dimoun ki kapab travay pour pran zot responsabilite e rod en travay e non pa reste dan lakour oubyen asize nanryen fer.  I ti osi koz lo rol ek responsabilite Leta pour kontinyen amelyor sityasyon ekonomik nou pei e osi rol sekter prive. Me i ti osi atir latansyon lo mank respe pour zour sanktifikasyon ki Dimans. I ti fer remarke ki menm si lavi in sanze e i annan bann demann ekzizan dan serten travay, i osi annan en bon rezon deryer nesesite pour repoze e sanktifye Dimans e sa i pour viv lavi familyal.

Monsenyer Wiehe ti osi salye bann travayer etranze dan nou pei e dir zot ki zot toultan byenveni dan nou pei e envit zot pour partisip dan bann servis relizye. I ti osi demann tou Seselwa pour sanz fason nou get sa bann dimoun.

«Sa bann travayer zot annan en lavi difisil, zot lwen avek zot fanmir, zot kiltir e zot fer bokou sakrifis pour ganny zot lavi e zot viv povreman e ekonomiz sa ki zot kapab me zot pe kontribye dan devlopman ekonomik nou pei», Monsenyer Wiehe ti dir an demandan tou dimoun pour annan plis lazistis ek lasarite pour bann travayer etranze dan nou pei.

Pandan sa seremoni tou bann travayer ti osi ganny zot lanmen beni.