Lider lopozisyon David Pierre i demisyonnen |17 May 2016

• Francesca Monnaie i ranplas li

Lider lopozisyon dan Lasanble Nasyonal David Pierre in prezant son demisyon avek Spiker Lasanble Nasyonal Dr Patrick Herminie.

I ti fer sa atraver en let ki i ti anvoy kot Spiker Lasanble yer.

Msye Pierre in osi anonse ki i’n demisyonnen konman lider Mouvman Demokratik Popiler (PDM).

Dan toulede pos se Manmzel Francesca Monnaie ki’n ranplas Msye Pierre.

Pandan en konferans avek medya yer apremidi, Msye Pierre ti dir : «Mon’n touzour brav pour siport sa ki mon konsyans ek nou prensip i dir avek mwan ti bon e rezet sa ki nou krwar i pa ti apropriye pour Sesel. Mon swete ki nouvo leadership i gard zot idantite e kontinyen travay an gardan bann gran valer prensip ek krwayans PDM». 

Rezon par deryer son demisyon i akoz i krwar ki apre sa rezilta dan eleksyon prezidansyel lannen pase sa parti i bezwen en nouvo lider.

«Mon demisyon pa devret vedir ki tou i fini la akoz mon krwar ki rezilta eleksyon ti en siny ki nou devret renouvle parti PDM. Annefe se sa ki’n vreman pous mwan pour fer sa lepa,» i ti dir.

I ti dir ki lademokrasi in fer li realize ki i pou apopriye pour li sed sa plas avek bi pour donn sa parti en pli gran sans pour bouz devan.

«PDM i en zenn parti e son lider par enterim i egalman en zenn madanm e mon napa okenn dout ki i annan sa kapasite ek lafors pour anmenn sa parti lo en lot nivo,» Msye Pierre ti dir.

«Sa desizyon i en pa annavan pour tou bann madanm Seselwa e i osi ede pour ranforsi rol madanm dan nou sosyete,» i ti azoute.

In remersye tou bann dimoun ki’n ede e siport li dan son travay.

I ti dir ki aprezan i ganny sa sans pour eksplor tou posibilite ki lavi i anmenn pour li.

Dapre konstitisyon PDM, manm komite egzekitif i annan sa pouvwar pour elekte zofisye parti dan bann tel sirkonstans parey demisyon Msye Pierre.

Manmzel Monnaie, ki ti sekreter zeneral PDM, in aprezan ganny elekte lider enterim PDM par bann manm egzekitif ziska ler ki zot fer zot miting zeneral anyel.

Ranplasman sekreter zeneral i Doreen Nancy, ki ti depite sekreter zeneral, e sa pozisyon depite i ankor ouver.

I ti remersye Msye Pierre pour son devouman pandan sa senk an.

«Personnelman mon’n aprann bokou atraver Msye Pierre ek son bann prensip demokratik ki i’n demontre. Lo kote parti mon sa dimoun ideal ki konpran ki PDM i anvi e mon aksepte sa challenge ki egzekitif i met lo mon akoz zot vwar mon kapabilite, zot vwar mon fason fer, zot krwar dan mwan e mon pa vwar en rezon akoz ki mon pa kapab reprezant PDM,» i ti dir.