Follow us on:

Facebook Twitter LinkedIn YouTube

Archive -Seychelles

En pye dibwa i kraz en lakaz Bel Eau |18 May 2016

En gro pye mang in tonm lo en lakaz Bel Eau e kraz son twatir.

Erezman personn pa’n ganny dimal e okenn keksoz dan sa lakaz pa’n andomaze.

Sa lakaz trwa lasanm ki form parti en flat Bel Eau, i pour Madanm Marcelle Bibi e i annan 5 manm fanmiy ki reste ladan.

Zofisye Property Management Corporation (PMC), ki antretenir sa bann flat, ti pas lo sit aksidan pour evalye domaz ki’n arive. Zot in promet bann fanmiy ki reparasyon twatir zot lakaz i a konplete dan 4 a 5 zour.

Ler zournal Seychelles NATION ti arive, kontrakter ki ti’n ganny anvoye par PMC ti’n fini koup sa pye mang e retir li lo sa lakaz. Travay netwayaz ti’n preski konplete.

«Sa bann fanmiy pou ganny mete tanporerman kot Maison Football pour 4 a 5 zour ziska reparasyon lo twa zot lakaz i konplete,» Madanm Alexandrine Zelia, administrater distrik Bel Air ti dir.

Madanm Zelia ti osi lo sit pe evalye sitiasyon.

Sa pye dibwa ki’n tonbe i obor en larivyer. E parey nou okouran, lanvironnman pa anfaver koup pye dibwa ki obor larivyer. Me i annan en lot pye ki’n kabannen e kapab koz ankor dega lo sa lakaz.

 

 

 

» Back to Archive