Follow us on:

Facebook Twitter LinkedIn YouTube

Archive -President Michel

Prezidan Michel i vizit La Digue |25 May 2016

Bann aze i demann Prezidan pour mentenir direksyon pei

 

Prezidan James Michel ti vizit La Digue yer dan kad en seri vizit ki i pe antreprann dan bann distrik.

Sa vizit lo sa zil ti trwazyenm apre ki i ti’n deza pas dan distrik Grand Anse ek Baie Sainte Anne lo Praslin.

Konpare avek lannen pase kot i ti met lanfaz lo antreprenarya ek bann pti biznes, sa lannen prezidan pe konsantre lo vizit bann 3enm az e aport son rekonnesans pour kontribisyon ki zot in fer dan lasosyete.

La Digue pa ti en leksepsyon kot Msye Michel ti vizit 10 lakour kot i annan dimoun aze ki reste. Dan dyalog ki i ti annan avek zot, ban granmoun ti an zeneral demann prezidan pour mentenir direksyon ki in swazir pour pei.

Sa i sirtou apre ki zot ti’n montre zot lapresiasyon pour bann mezir ki gouvernman in pran pour asir zot konfor, sirtou logmantasyon dan pansyon vyeyar.

Laplipar sa bann pansyonner ti eksprim satisfaksyon ki zot annan pour viv zot bann vye zour dan en serten konfor ek trankilite.

Sa i malgre bann pti sousi lasante ek difikilte parfwa pour ganny swen spesyalize lo La Digue oubyen Praslin.

Manm Lasanble Nasyonal pour La Digue Chantal Ghislain ki ti pe akonpanny prezidan dan son parkour yer, in rekonnet ki bann zabitan sa zil i esper tro lontan avan kapab vwar en spesyalis e ki ler zot arive ganny en randevou, zot esper tro lontan kot klinik Praslin ou Mahé avan vwar dokter.

In azoute ki bann pasyan Digwa i osi depans bokou ler zot deplase pour al rod swen spesyalize. Konman solisyon, in propoze ki i annan spesyalis ki vizit La Digue ase souvan.

Malgre ki La Digue i sanble parfwa ganny kit deryer konpare avek devlopman lo nivo nasyonal, prezidan ti ganny sans obzerv serten proze devlopman lo sa zil. Par egzanp, proze pour fouy drenaz e retir delo ki monte otour Lanmar Soupap, La Passe, sirtou pandan letan lapli.

I ti osi kapab apresye devlopman ek potansyel touristik, kot malgre bokou pti lotel zere par Seselwa, i ankor annan bokou demann pour lasanm.

Dan en lakour ki i ti vizite, i ti kapab apresye kot sa fanmir pe konstrir en pti kafeterya avek en larsitektir Kreol.

Minis pour Zafer Sosyal, Devlopman Kominoter ek Spor Vincent Meriton ki ti osi pe akonpanny Prezidan Michel, ti dir ki ler nou ekout lasazes bann trwazyenm-az, sa i permet nou mentenir sa devlopman.

I ti azoute ki nou bezwen gard nou direksyon an se ki konsern konfor bann dimoun aze.

«Zot in travay dir e la zot bezwen viv zot lavi dor dan konfor ek trankilite,» Minis Meriton ti dir.

I ti soulinyen ki pour nou gard nou bann aki, i enportan ki Seselwa pa divize me plito reste ini ansanm.

Nou prezant nou lekter serten portre vizit Prezidan Michel lo La Digue tire par Romano Laurence.

 

 

 

 

 

 

 

» Back to Archive