Dife i parsyelman detri en lakaz Bel Air |28 May 2016
En lakaz an blok 5 lasanm ki abrit 2 fanmir ti parsyelman detri par dife yer anviron midi.
Manm sa 2 fanmir 6 dimoun pa ti la kot lakaz ler dife ti pran.
Lazans Servis Tenny Dife ek Sovtaz i dir en pasan ki ti vwar dife e alert zot e sa ti 11.56.
Portparol sa lazans, Msye Jones Madeleine, i dir ti pran zot 20 minit pour met sa dife anba kontrol e en pe plis ki 2erdtan pour tenny li net.
“Ler nou ti ariv dan sa landrwa dife ti pe sorti dan plafon e en kote sa lakaz ti’n detri konpletman tandis ki lot kote zis plafon ki’n andomaze me tou son konteni i entakt me in ganny afekte avek delo selman,” Msye Madeleine ti dir.
I ti azoute ki divan ti vreman for pandan sa letan e sa in ede pour propaz dife pli vit me erezman zot ti ariv atan pour anpes plis dega.
Pour lemoman pa kler kwa ki’n koz sa dife e en lanket in konmanse.