Kominike Lapolis - De aksidan fatal dan de zour |30 May 2016

En zenn madanm ek en zenn-onm ti perdi zot lavi pandan wikenn swivan de aksidan separe.

Dan premye aksidan, Dariel Fanchette, en zenn-onm 19-an, ti perdi kontrol moter ki i ti lola, tap avek en ‘crash barrier’ e al fini dan manglier Port Glaud.

Dariel ti ganny sertifye mor Lopital Sesel Vandredi swar apre resevwar premye swen klinik Anse Boileau.

O moman sa aksidan Dariel ti dan konpanni en koleg aze 20-an ki li i admit lo ward.

Dapre rapor aksidan ti arive letan ki Dariel ti pe ‘overtake’ 2 transpor.

Lapolis pe fer lanket dan sa aksidan ki ti ganny raporte ver 5:05 Vandredi apremidi.

Dan dezyenm aksidan en madanm 28-an, Ima Lenclume ki reste Au Cap, ti mor apre ki i ti’n ganny tape par en bis SPTC dan zanmerant ansyen klinik English River.

Dapre rapor Lenclume ti pe koup semen sorti lo kote borlanmer letan sa bis ki ti’n sorti lo terminal pour direksyon Nor ti tap li.

Ti en pti pe letan apre minwi yer ki lotorite medikal Lopital Sesel ti enform lapolis ki Lenclume ti’n mor dan younit swen entansif kot i ti’n ganny admit dan en kondisyon kritik.

Lapolis pe fer lanket dan sa ka raporte arive ver 7er diswar Sanmdi.

Sa ka fatal i fer dezyenm dan 2 zour e trwazyenm dan lespas en semenn.

Swivan sa, lapolis pe ankor enn fwa lans lapel avek tou dimoun ki servi larout piblik pour pran bokou plis prekosyon ler zot lo semen.

Antretan, lapolis pe egalman fer lanket dan en ka kot en garson 20-an in prezimen pann deryer kot lakaz son paran Sans Soucis.

Dapre paran, dernyen fwa zot ti war zot garson, Thomas Rosalie, vivan ti ver 9er diswar Vandredi letan i ti antre kot lakaz.

Rapor sa lensidan ti ganny fer par papa Thomas ver 00:55 Sanmdi granmaten.