Kominike Lapolis |31 May 2016

En zonm 21-an ki reste Baie Lazare i admit dan younit swen entansif swivan en aksidan lo ‘highway’ yer granmaten. Kondisyon sa zonm, ki’n ganny dimal ase serye, in sepandan ganny dekri konman stab.

Dapre rapor sa zonm ti pe fer direksyon lavil letan i ti perdi kontrol loto ki i ti pe dray e tap dan ‘crash barrier’ an kitan pon vizavi bazar Cascade.

Rapor sa aksidan ti ganny fer avek lapolis ver 00:30 granmaten.

**********

An sa ki konsern aksidan fatal Ima Lenclume, swivan lanket ki lapolis pe fer dan sa ka, in etabli ki sa lensidan in ariv lo ‘compound’ SPTC, sa landrwa, ant batiman Orion Mall avek ansyen vye klinik English River kot bis i sorti pour antre lo grann rout lo Laveni 5 Zen, ki vedir Ima pa ti pe koup semen sorti kote borlanmer pour al lo kote montanny parey ti’n ganny raporte oparavan.

In egalman ganny etabli ki Ima ki reste Au Cap i aze 26-an e non pa 28-an.

Drayver sa bis SPTC, enplike dan sa ka fatal, in sepandan pas ankour yer apremidi e in ganny rimann ziska le 10 Zen.

**********

Lapolis in osi raporte ki rezilta letopsi fer lo lekor Thomas Rosalie, sa garson 20-an ki ti ganny raporte prezimen pann kot lakour son paran Sans Soucis dan milye lannwit Vandredi pour al lo Sanmdi, in etabli ki sa garson in annefe mor par pann.

Orizinalman lapolis ti’n fer resorti ki dernyen fwa ki son paran ti’n vwar li vivan ti ver 9er diswar me in etabli ki ti ver 11er diswar ki paran Thomas ti vwar li vivan dernyen fwa.