Lasanble Lazenes i demann lotorite konsernen pour anpes zenn dan lanplwa ganny viktimize |31 May 2016

I neseser ki bann lotorite konsernen avek lanplwa zenn, sirtou Minister Lanplwa  ek Devlopman Resours Imen, zot vin pli profesyonnel, pran konplent ek konsern bann zenn lo size zot lanplwa serye e gard konfidansyalite ler zot fer lanket dan sa bann ka pour anpese ki sa bann zenn ki anmenn konplent lo sa size pa apre ganny viktimize par zot anplwayer ek lezot dimoun ki zot travay avek.

Sa ti enn parmi 2 mosyon ki 13enm Lasanble Lazenes ti table dan zot sesyon Sanmdi bomaten.

Sa mosyon ti table par reprezantan pour English River Jerry Bibi.

Lot mosyon table par reprezantan zenn Plaisance, Angelique Aglae, ti pe demann lotorite konsernen pour fer en resers pour vwar akoz en kantite zenn i kontinyen ranpli kot Orion Mall e angaz zot dan toudsort aktivite ki pa neseserman bon e pe koz plizyer kalite lenkonvenyans pour bann biznes, pasan ek lezot dimoun ek servis dan sa landrwa.

An sa  ki konsern sa premye mosyon lo lanplwa son loter ti fer resorti ki lamazorite zenn Seselwa i anvi travay e kontan letan zot in ganny en lanplwa me bokou fwa zot dekouraze lo fason zot ganny trete.

“Viktimizasyon i egziste e i reel akoz napa profesyonnalizm ek konfidansyalite letan sa bann zofisye lanplwa zot fer envestigasyon dan konplent ki bann zenn i anmenn devan,” Msye Bibi ti fer resorti ler i ti prezant son mosyon.

I ti azoute ki apre ki zot in konnen lekel sa zenn ki’n fer sa konplent kont zot, sa bann anplwayer oubyen managers zot fer sa bann zenn martir dan diferan fason e sa i enkli kot zot ganny prive promosyon, sans pour fer formasyon, parmi lezot ki fer ki bokou fwa zot kite travay.

Dan en letan kot bokou keksoz negativ pe ganny dir lo zenn vizavi lanplwa tel parey zot pa oule travay, parmi lezot ankor, Msye Bibi i dir i enportan ki bann zenn ki anvi travay i ganny ankouraze e proteze byen e non pa ganny viktimize apre okenn zefor ki zot fer pour esey amelyor zot kondisyon ek lanvironnman travay.

Tou bann lezot reprezantan zenn ki ti pran laparol ti koz fortman anfaver sa mosyon.

Olivia Revera, reprezantan Baie Lazare ki ti segonn sa mosyon, ti dir ki viktimizasyon zenn dan lanplwa i reel e bokou zot zot plifere pa al devan pour fer okenn konplent e anmar leker akoz zot pa anvi perdi zot travay tandis ki lezot i plito kite san dir nanryen e perdi zot sans pour progrese.

Jean-Michel Camille, reprezantan Lekol Letid Avanse (Sals), ti fer resorti ki Minis Idith Alexander limenm ti ensiste letan i ti reponn kestyon dan Lasanble Nasyonal an Mars sa lannen lo size lanplwa ki son minister pa zanmen negliz okenn ka  viktimizasyon dan travay.

“Me viktimizasyon i ankor la e i devret ganny gete oprofon akoz ni gouvernman, ni Minister Lanplwa pa kapab kasyet sa e bann anplwayer pa kapab kontinyen fer bann zenn Seselwa vin lesklav dan zot prop pei akoz Sesel in met lesklavaz deryer li i annan byen lontan,” Msye Camille ti dir.

Rodney Jeremie, reprezantan Beau Vallon, ti dir ki bokou sa bann ka i ariv dan bann lakonpannyen prive kot bann managers etranze i tret zenn Seselwa konman nanryen ditou e zot favoriz bann lezot travayer etranze.

I dir an rezilta sa i annan zenn ki tonm dan lalkol ek labi sibstans pour zot esey oubliy zot problenm dan travay.

Sa mosyon ti ganny laprouvasyon bann manm.

Pour mosyon ki konsern frekantasyon zenn kot Orion Mall  loter ti dir dan son prezantasyon ki  fodre trouv en solisyon akoz zenn i mal konport zot dan sa landrwa me ki kefwa napa en lot landrwa apropriye ase pre avek lavil pour zot hang out e rankontre zanmi.

Sa mosyon osi ti lev bokou deba e Neddy Jean, reprezantan pour Saint Louis, ki ti osi segonn sa mosyon, ti fer resorti ki en solisyon lo sa size i bezwen ganny touve o pli vit posib.

Me i ti ensiste ki paran i anan en pli gran rol pour zwe pour edik zot zenn savwar viv ek respe pour dimoun ek propriyete.

Ivan Vidot, depite speaker Lasanble Lazenes, ti lo son kote fer resorti ki bann zenn konmela zot viv dan diber e ki i annan bokou mekanizm anplas pour ed zot fer bann aktivite ki pour anmenn rezilta pozitiv pour zot e ki se zot ki devret swazir sa ki bon pour zot.

“Sa sitiasyon kot Orion Mall pa en problenm gouvernman me i responsabilite management sa landrwa pour adres li,” i ti fer resorti.

Pour Jean-Michel Camille, reprezantan Sals, lapolis i devret entansifye son patrol dan sa landrwa parey i ti promet pour fer lannen pase.

I ti azoute ki management Orion Mall ansanm avek lapolis osi byen ki Konsey Nasyonal Lazenes i devret travay ansanm, vin avek bann lide inovativ pour esey   adres sa problenm olye zis anpes zenn vin dan sa landrwa.

Sa mosyon osi ti ganny aprouve par bann manm.