Legzibisyon: ‘Mon kontan ou’ |01 June 2016

Zanfan i desin zot santiman lanmour pour Sesel

Envite pe admir bann desen dan legzibisyon

En trantenn zoli desen kree par bann zafan lekol primer sorti dan tou rezyon ti ganny devwale yer bomaten dan Carrefour des Arts ki sitie obor Libreri Nasyonal. Anba tenm ‘Mon kontan ou’, sa bann diferan desen, lapentir ek kolaz byen kolore pe ganny egzibite pour premye fwa akonpannyen par en poenm relye avek sa desen.

Zot lenspirasyon pour zot bann desen i relye avek tenm nasyonal ‘Mon Kontan Sesel’ ki ti ganny relanse ankor pour sa lannen par Prezidan Larepiblik James Alix Michel.

Sa bann desen ti’n deza ganny fer depi lannen pase par sa bann zanfan. Lannen pase IECD (Lenstiti pour Devlopman Pti Anfans) ti lans en konpetisyon poenm baze lo tenm nasyonal e vi ki bann poenm ti byen zoli, sa bann zenn pti poet ki ti dan P2 sa letan ti ganny demande pour desin en desen pour dekrir zot poenm e se la kot zot ti vin bann pti artis osi. Sa letan zis bann poenm ki ti ganny zize par trwa poet profesyonnel e bann ki ti ganny swazir ti ganny pibiye dan en liv akonpannyen par serten sa bann desen. Me vi ki sa lannen menm tenm nasyonal in ganny mentenir, IECD i dir ki zot in reservi tou sa bann desen e zize osi par de artis profesyonnel zot ti ganny sa trant ki zot in met dan legzibisyon akonpannyen safwasi par zot poenm. Savedir sak zanfan ki ti fer son poenm zot ti osi desin zot prop desen. La zot aktyelman dan P3.

Se Minis pour Tourizm ek Kiltir Alain ST Ange ki ti ganny loner pour ouver sa legzibisyon ki’n ganny organize par IECD an kolaborasyon avek Konsey Nasyonal pour Lar(Nac).

Osi prezan kot louvertir ti le de sekreter prensipal dan sa minister -- Anne Lafortune (tourizm) ek Benjamine Rose (kiltir), sef egzekitif IECD Shirley Choppy, sef egzekitif pour Nac Jimmy Savy, bann zanfan, ansennyan, paran ek lezot envite.

Pandan seremoni, zenn artis-poet El Alvis, 8-an sorti lekol Beau Vallon, ti resit son poenm avek tit ‘Ou ris an lanatir’ swivi par en pti pyes teat par lekol Anse Etoile. Reuben Furneau, aze 8-an li osi e sorti lekol Anse Etoile, ti ganny loner pour prezant Minis St Ange avek en kopi son desen.

I ti dir ki son desen i reprezant lafason ki bann zafan i viv e zwe ansanm zwayezman dan lekol. Alvis ti dekri son desen konman Sesel sa landrwa kot i zoli e kot i annan bokou fler ek fri lokal ki dou pour manze.

Tou zanfan ti ganny en sertifika lapresiasyon pour zot kontribisyon anver sa legzibisyon.

Dan son diskour louvertir Minis St Ange ti felisit IECD pour son linisyativ pour organiz sa legzibisyon ki’n ede fer sorti bann zenn pti talan ki egziste dan Sesel. “Ler ou vwar en ‘sketch’ ki sorti dan leker en zanfan ki koz lo linite dan en kote me ki osi koz lo tou bann atou ki nou pei i annan, i bezwen fer nou tou realiz labote nou pei ek lenportans ki zanfan a sa pti laz i atase avek lendistri tourizm son pei,” i ti dir.

I ti asir bann zanfan ki dan zot naivte, son minister atraver Nac pou ed zot aprofondir zot don artistik ki petet ava annan parmi ki a kapab trouv en karyer alavenir.

Madanm Choppy lo son kote ti dekri sa legzibisyon konman en “lekspresyon patriotik” e i ti ankouraz tou dimoun pour vin vwar “Sesel atraver lizye sa bann pti artis e petet i ava donn nou rezon pour kontan nou pei plis ankor”.

“Mon osi demann bann paran pour ankouraz zot zanfan pour itiliz byen zot lenerzi dan fason pozitiv e lekel ki konnen? Demen nou a kapab annan en Picasso isi,” i ti  dir.

Msye Savy ti osi felisit sa bann zenn artis-poet pour zot lapresiasyon pour lar ki ava ede pour annan bann ‘art lovers’ dan le fitir akoz dapre zot resers, napa bokou dimoun ki apresye lar dan Sesel.

Sa legzibisyon, ki osi koensid avek Lafet Zafan ki tonm ozordi, pou reste ouver ziska Sanmdi le 4 Zen.