30enm Kongre Parti Lepep - ‘Parti Lepep zanmen in per lalit’ |03 June 2016

Prezidan Parti Lepep, James Michel, in dir ki son parti zanmen in per lalit akoz se lalit ki’n fer sa parti for, kouraze e viktorye.

«Se lalit ki’n donn nesans nou parti. Se lalit ki’n anmenn devlopman ek progre pour nou pei. Se lalit ki’n fer nou parti for, kouraze e viktorye. Se lalit ki’n fer nou sa ki nou ete ozordi,» Msye Michel in dir.

I ti fer sa bann remark yer letan i ti pe lans 30enm Kongre Parti Lepep ki ti deroul Maison du Peuple.

Sa kongre, ki ti deroul dan prezans bann manm komite santral, bann responsab ek komite distrik, parmi lezot envite, ti annan pour tenm ‘Nou Parti, Nou Lalit, Pli Determinen ki Zanmen’.

Dan son diskour pour ofisyelman deklar ouver sa 30enm Kongre, Msye Michel, ki osi Prezidan Sesel, ti dir ki mwan Zen i spesyal akoz i mark trwa levennman tre enportan : nou lendepandans, nou liberasyon e formasyon Trwazyenm Repiblik.

«Nou Kongre i en selebrasyon sa trwa levennman ki’n ankre dan nou listwar. I fer nou rapel sinifikasyon nou lendepandans ki NOU — SPUP sa lepok — ti rode. I fer nou rapel revolisyon ki ti anmenn vre lendepandans pour nou pei. E i fer nou rapel nou levolisyon ver en Leta modern,» Msye Michel ti dir.

Msye Michel ti osi fer resorti ki Parti Lepep i annan ankor en kantite travay pour fer akoz prosen eleksyon ki pe vini.

«I annan travay serye devan nou. I annan ankor en lot lalit ki devan. Me nou parti zanmen in per lalit. Se lalit ki’n donn nesans nou parti. Se lalit ki’n anmenn devlopman ek progre pour nou pei. Se lalit ki’n fer nou parti for, kouraze e viktorye. Se lalit ki’n fer nou sa ki nou ete ozordi,» i ti dir.

«Sa lalit ki devan nou pou teste linite dan nou ran. I pou teste nou lafors. I pou teste nou rezilyans. I pou mark en nouvo letap dan lavenir nou pep ek nou pei. Me se Parti Lepep ki pou sorti viktorye dan sa lalit,» Msye Michel ti dir bann delege.

Msye Michel ti osi fer resorti ki lopozisyon i pli rize ki avan e ki Parti Lepep pa devret souzestim lopozisyon.

«Pour nou fer fas a sa bann mannev lopozisyon, nou bezwen fer plizyer keksoz. Nou bezwen reste konsantre lo nou travay. Nou bezwen kontinyen annan konviksyon dan nou prensip, dan nou kapasite pour anmenn ankor en meyer lavenir pour Sesel. Nou bezwen met nou lentere personnel dekote e redouble nou zefor pour nou ganny sa eleksyon ki pe vini,» Msye Michel ti dir.

I ti azoute ki dan sa lalit i annan plizyer prensip fondamantal e sa i enkli: defann drwa fondamantal ek laliberte tou Seselwa; kontinyen lite pour fer sir ki tou Seselwa i viv dan dignite; protez e amelyor byen ek servis piblik; prezerv lape, stabilite ek linite.