Eleksyon lezislativ 2016: |09 June 2016

Zabitan Persévérance pou vot dan distrik kot zot in anrezistre

Apre plizyer diskisyon e diferan komanter sorti kot bann parti politik ek piblik an zeneral lo sa size, i aprezan ofisyel ki pour eleksyon lezislativ ki sipoze fer plitar sa lannen, bann zabitan Ile Persévérance ki kalifye pour vote pou vot dan distrik kot zot in anrezistre.

Sa i parey ti leka pour eleksyon prezidansyel ki ti fer an Desanm lannen pase.

Pour bann dimoun ki’n ganny 18-an apre dernyen eleksyon e bann ki ti aletranze e ki pou napa trwa mwan depi ki zot pe reste Persévérance ler eleksyon i arive, zot pou vot dan distrik kot zot ti pe reste avan, oubyen avan ki zot ti kit pei.

En eleksyon pour elekte en manm Lasanble Nasyonal pour Ile Persévérance tousel pou sepandan ganny organize avan 1-an apre ki sa landrwa in ofisyelman vin en distrik elektoral.

Prokirer Zeneral Rony Govinden in eksplike akoz ki anba lalwa, bann voter lo sa zil konble pa pou kapab vot pour en reprezantan pour zot distrik pandan prosen eleksyon. Sa i akoz menm si Lasanble Nasyonal in deza vote pour ki Ile Persévérance i vin en distrik, menm si sa in ganny aprouve par Prezidan e in gazete dan Gazet Ofisyel, i pou selman kapab vin en distrik elektoral apre ki Lasanble Nasyonal i dizourd.

Anmenmtan, lalwa i dir ki fodre ou reste dan en distrik elektoral pandan omwen trwa mwan pour ou kapab vote dan sa distrik. Sa pa pou leka pour bann zabitan Persévérance avan prosen elsksyon i fer, akoz Komisyon Eleksyon i bezwen fer eleksyon avan trwa mwan apre ki Lasanble in dizourd.

Prokirer Zeneral in azoute ki si i pa ti’n pran sa desizyon, i ti pou’n bezwen propoz en lamandman dan Konstitisyon pour ki bann dimoun ki kalifye pour vote Persévérance i kapab egzers zot drwa. Sepandan in dir ki i pa’n vwar nesesite pour sanz Konstitisyon, akoz napa mal ladan e i pa en dokiman ki ou zwe avek bonnavini.

«Sa solisyon i meyer alternativ, akoz otreman sa bann dimoun pa ti pou kapab vote. Sa pa ti pou byen pour nou demokrasi ek nou bann valer demokratik,» i ti ensiste.

Lo kestyon si sa bann zabitan pa pou pe vot de fwa pour menm Lasanble lefe ki en lot eleksyon pou fer Persévérance plitar, Msye Govinden ti dir ki sa i arive dan en eleksyon parsyel oubyen ‘bye election’ an angle, kot en manm lasanble i mor oubyen demisyonnen. Sa i menm si sa ka spesifik Persévérance i kapab konsern en gran kantite dimoun, konpare avek eleksyon parsyel. I ti azoute ki sa pa afekte prensip «en dimoun, en vot» e ki i okontrer donn tou dimoun sans vote. I ti osi rezet posibilite ki sa desizyon i kapab anfaver okenn parti politik ki kapab annan plis siporter Persévérance e ki pou ganny posibilite vot de fwa pour menm Lasanble e pour de kandida diferan.

«Mon motivasyon pa politik, me legal,» Msye Govinden ti presize, an azoutan ki i pa ti pou posib pour par egzanp fer sa bann dimoun vot dan distrik vwazen Rivière Anglaise oubyen Anse Etoile, akoz sa «ti pou poz en problenm dan lekilib bann distrik».

Sa opsyon ti pou osi nesesit ki rezis voter i sanze. Sa ti pou osi aplike si bann zabitan Persévérance pa ti pou partisip dan eleksyon ki pe vini an votan dan zot distrik, me plito esper en sel eleksyon apre ki sa distrik i vin ofisyel. Dan sa enn ka, Komisyon Eleksyon ti pou bezwen tanporerman tir zot non lo lalis voter.

Lo si ti napa posibilite pour konmans prosesis pour ki Ile Persévérance i vin en distrik elektoral pli boner pour ki son bann zabitan i ganny sans elekte zot prop Manm Lasanble dan prosen eleksyon, Prokirer Zeneral ti rezet sa responsabilite lo Komisyon Eleksyon, an dizan ki egzekitif napa kontrol lo desizyon ki sa komisyon i pran.

«Si Komisyon Eleksyon pa’n soumet son rapor avan, gouvernman pa pou kapab fer nanryen,» Msye Govinden ti konklir.