4enm Show Nasyonal 2016 - En levennman ki montre bokou travay ek zefor |27 June 2016

Apre ki ansanm avek Prezidan James Michel i ti’n vizit bann diferan stól, koz en pti pe avek bann partisipan, Vis-Prezidan Danny Faure, ki osi tyermenn komite lorganizasyon Lafet Nasyonal, ti felisit komite lorganizasyon e tou bann partisipan ki’n met tou zot zefor e donn zot letan, lenerzi pour asire ki bann prodwi ki zot partisip avek i alaoter.

“I annan en tre bon travay ki’n ganny fer. In annan bokou planifikasyon, standar i o e i bann travay ki’n pran letan pour fer,” Viz-Prezidan Faure ti fer remarke.

I dir partisipan in travay dir pour asire ki i annan varyete keksoz pour dimoun ki vini, swazir kot pour ale. “Prezidan Michel i tre kontan e i dir nou’n akonplir bann lobzektif ki komite lorganizasyon in etabli,” i ti dir.

A sa moman kot pei pe selebre 40enm lanniverser son lendepandans Vis-Prezidan Faure i dir ki pour sa  bann partisipan in mazin Sesel e kwa ki nou kapab fer anplis.

“I annan sa eleman fer keksoz anplis e bann prodwi i montre sa e pour mwan mon vwar sa konman en langazman dan nou patriotizm. Nou pe selebre nou lakonplisman konman en nasyon e konman en pei kot dimoun in profit loportinite, bann striktir anplas e pe fer keksoz pour zot e osi pour Sesel,” VP Faure i dir.

I dir ki malgre nou diversite nou devret pe servi sa 3 zour pour nou mazin Sesel avan tou, nou lakonplisman, nou linite nasyonal e tou keksoz ki anmenn nou ansanm.

Parmi tou sa kantite latraksyon ki annan kot sa enn 4enm Show Nasyonal bann stòl ki ti pe atir bokou dimoun  i bann fasilite ki Seypec avek SCAA i annan pour bann zanfan.

Diferan kalite meb lokal kot diferan lakonpannyen enkli Furniture Cave ki shop manager madanm Patricia Port-Louis i dir sa lannen i annan bann ki enteresan menm.

Dimoun ki konsyan zot lasante zot kapab ganny tou bann lenformasyon lo nitrisyon, legzersis, delo e tou bann remed natirel pour en lavi an bonn sante anba latant SDA Mission, en NGO kot plizyer zofisye ti la pour edik piblik.

Pour bann zafan lekol ek lezot pasyonnen par listwar nou pei, en stòl legzibiyon transpor i vreman pe atir en gran lafoul. Prezidan James Michel avek Vis-Prezidan Faure ti fasinen par sa ki zot ti vwar e ti pas en bon pe letan la pour admir bann zimaz ek bann diferan model loto ek lezot mwayen transpor ki ti an egzibit.

Tou kalite bato, avyon, mwayen transpor piblik ek diferan mwayen transportasyon: lo latet, lo takon, saret ek pous tousala piblik i kapab vwar e apresye.

Enn bann viziter i dir ki i vreman en voyaz atraver listwar.

Msye Emmanuel D’Offay ki responsab sa seksyon i dir tou bann lobze i sorti dan son koleksyon e in pran li plizyer mwan pour travay lo montaz sa legzibisyon.

“Sa i selman en pti pe sa ki mon ti’n kapab anmennen, mon satisfe e mon swete piblik i apresye,” i ti dir.

Lo kote bann prodwi agrikol i annan menm, e bann zanimo laferm osi i annan menm e diferan varyete ki kre en latraksyon enkrwayab pour tou laz.

Anvant i osi annan plizyer prodwi ek plant ki’n pare pour plante dan lakour.