‘Sa swar nou ti ganny nou idantite konman en pep’ |28 June 2016

Madanm Ravinia Low Hong ki reste Belonie i rapel byen sa swar zour  lendepandans menm si ozordi i aze 89-an.

“Mon ti desann pour al get sa seremoni sa zour swar ler nou ti ganny nou paviyon. Mon msye ti tir portre sa levennman akoz sa i son metye. Sa zour swar ti en levennman ki ti ranpli mwan avek lemosyon e mon ti  ganny frison ler sa 2 paviyon ti krwaz avek kanmarad -- enn pe monte, enn pe desann. Tou dimoun enkli mwan osi nou ti vreman kontan akoz nou ti ganny nou idantite konman en pep sa zour swar”.

“Avan lendepandans nou ti vreman dan fernwanr, nou ti mizer e dimoun pa ti tro konpran sa ki ti pe pase.  Pa tou zanfan ki ti kapab al lekol. Me pti a pti letan bann dirizan parey Msye Albert Rene ti konmans koz lo politik dan bann miting dimoun ti konmans konpran.  Avan lendepandans lavi ti dir Sesel e nou ti bezwen lite pour sonny nou bann zanfan. Louvraz ti rar. Me avek lendepandans lavi in vin pli meyer, bokou devlopman in arive e dimoun nepli bezwen al rod lasarite kot bann marsan akoz Leta i pran swen avek nou.”