Mesaz lider lopozisyon dan Lasanble Nasyonal Franchesca Monnaie alokazyon 40enm Lanniverser nou Lendepandans le 29 Zen, 2016 |30 June 2016
‘Annou selebre dan lape, linite, tolerans ek lanmour patriotik dan nou leker’
«Fodre nou pa vwar 40-an lendepandans konman zis sa ki nou’n devlope, sa ki nou’n akonpli me osi konman en konmansman pour en nouvo staz devlopman.»
Sa deklarasyon i sorti dan mesaz lider lopozisyon dan Lasanble Nasyonal Franchesca Monnaie alokazyon 40enm Lanniverser nou Lendepandans le 29 Zen, 2016.
Mesaz Manmzel Monnaie i lir koumsa:
«Sesel i vwar li dan son 40enm lannen lendepandans, en milestone dan son listwar.
«Kot Sesel in vwar devlopman, in fer fas avek defi e in osi selebre bann lakonplisman.
«Fodre nou pa vwar 40-an lendepandans konman zis sa ki nou’n devlope, sa ki nou’n akonpli me osi konman en konmansman pour en nouvo staz devlopman. Annou fer en analiz detaye bann devlopman, e annou travay pour aranz sa ki devret aranze, e sanze sa ki devret ganny sanze pour donn Seselwa en pli o nivo servis ki pou annan en lenpak pozitiv sirtou lo bann Seselwa ordiner.
«I neseser ki ler en pei i fer devlopman, i pa bliy ou kit personn deryer. Tou Seselwa i devret pe rezouir devlopman son pei; sa i donn en sans patriotizm lapopilasyon e enkilke lanmour dan leker Seselwa. Sa i devret ganny ankouraze dan nou pei, lanmour pour nou frer ek ser Seselwa, pe enport kouler lapo, kouler politik, oriantasyon seksyel ou diferans dan krwayans relizyez. Respe ek tolerans pour nou frer ek ser Seselwa i devret nou norm.
«40-an lendepandans i en moman dan nou liswar pour reflesir lo bokou laspe nou nasyon, me osi pour met en regar lo nou kiltir ek nou lidantite. Konman en nasyon eski nou fyer ki nou ete? Lamazorite pou dir wi, mon fyer ki mon en Seselwa. Sa lafyerte e sans patriotizm i form par ou lidantite!
«Annou selebre dan lape, linite, tolerans ek lanmour patriotik dan nou leker.
«Mon swet tou Seselwa en bonn fet 40-an Lendepandans!»