Follow us on:

Facebook Twitter LinkedIn YouTube

Archive -President Michel

‘Lepep pou touzour sorti venker si nou travay ansanm’ |30 June 2016

 

 

 

“Konman en pti pei, en pei ki pe devlope rapidman, ki pe travers sekous diferan kouran mondyal, napa lot opsyon ki lape, travay ansanm ek linite nasyonal.”

Se Prezidan James Michel ki ti dir sa dan son ladres yer swar alokazyon 40enm lanniverser nou lendepandans ki osi nou Lazournen Nasyonal.

I ti ensiste ki konman Prezidan elekte Repiblik Sesel, son lapel se linite, respe, tolerans, solidarite, konpasyon, travay ansanm, fer Sesel al annavan. 

Prezidan ti fer remarke ki dan en demokrasi, lepep pou touzour sorti venker.

«Ozordi, nou lafet nasyonal – lanniverser nou lendepandans – i osi en komemorasyon nou linite nasyonal. Konman Prezidan, mon ankor annan menm mesaz. Menm konviksyon ki’n touzour motiv mwan. Menm pasyon ki’n touzour anim mwan. Sa se linite nou pep ek lape dan nou pei. Mon pasyonnen dan mon travay pour linite ek lape.  Mon krwar ki konman en pti pei, en pei ki pe devlope rapidman, ki pe travers sekous diferan kouran mondyal napa lot opsyon. Malgre diversite nou lopinyon, malgre diversite dan nou pwendvi, nou bezwen travay ansanm. Finalman, se zis linite ek travay ansanm ki kapab anmenn Sesel pli devan. Se linite nasyonal ek travay ansanm, travay dir ansanm, ki’n fer nou fer sa progre ki nou’n akonpli,» Prezidan Michel ti dir.

Me i ti rapel nou ki si nou baskil sa, si nou sorti lo sa larout, nou pa pou al lwen.

«Pir, nou pou antre dan en lepok otodestriksyon, lanarsi ek vyolans. Se la ki nou pou vwar, ki nou pou konpran, kisisa lamizer nwanr. Nou annan ase legzanp kot sa pe arive dan sa lemonn tristeman divize.  Eski se sa kalite trazedi ki nou oule pour nou pei? Eski se sa kalite douler ki nou oule anmennen pour nou prop frer ek ser Seselwa? Non! E mil fwa non! Nou Seselwa nou pa oule divizyon. Nou pa oule vyolans. Nou pa oule destriksyon nou pei. Nou pa oule lamizer. Nou pa oule menas pez lo nou, lo nou lavenir, lo lavenir nou zanfan.  Mwan, mon dir tou Seselwa ozordi: nou oule viv anpe. Nou bezwen viv anpe. Mon dir zot: nou oule boner, progre ek prosperite tou Seselwa,” Msye Michel ti azoute.

I ti osi fer resorti  ki ozordi sa zanfan ki ne Sesel i annan tou sa loportinite pour li vin sa ki i anvi vini. Me i ti azoute ki fodre nou siport nou zanfan, donn zot lanmour, montre zot legzanp. Montre zot nou valer moral e spirityel. Montre zot valer patriyotizm ek linite nasyonal.

«Mon dir zot, mon dir tou Seselwa: nou oule lape, stabilite ek linite dan nou pei. Mon dir zot:  ler nou pa tonm dakor avek serten keksoz i annan fason, striktir ek lenstitisyon pour adres sa bann dezakor. E nou bezwen respe sa bann striktir ek lenstitisyon. Zot reprezant Leta Seselwa. E nou osi bezwen respe lopinyon diverzan. I kontribye pour fer nou diversite dan lape. I en siny nou matirite.

«Alors, mon profit sa lokazyon pour adres konsyans pep Seselwa: konpran sa tre byen, ki napa lot fason me ki nou bezwen travay ansanm, viv ansanm, si nou oule nou pei kontinyen devlope e prospere.» 

Prezidan ti fer remarke ki ozordi i osi lokazyon pour selebre nou laliberte konman en pep, sa laliberte pour viv libreman dan en pei souveren e endepandan. I ti ensiste ki ozordi, anmezir ki nou demokrasi i evolye, nou laliberte pe ganny proteze par nou Konstitisyon.

«Nou annan lespas pour plis langazman e partisipasyon nou sitwayen. Nou annan laliberte larelizyon, nou annan laliberte lapres, nou annan laliberte pour apartenir a nenport parti politik ki nou oule, e nou annan laliberte lekspresyon.

Sepandan, bann rasanbleman ek demonstrasyon kot bann langaz tre ofansif lo bann lenstitisyon, parey Zidisyer, i en labi direk lo sa menm liberte ki nou annan lobligasyon pour promouvwar, e i al kont lespri respe pour bann lenstitisyon endepandan ki la pour protez nou drwa,», Prezidan ti ensiste an azoutan ki fodre nou fer atansyon ki nou pa senm laenn pour rekolte laenn a nou pa senm vanzans pour nou rekolte vanzans.

«Les matirite, tolerans ek solidarite nou pep kontinyen enspir nou, pour nou senm lanmour pour ki nou rekolte lanmour. Sakenn de nou, nou annan en rev pour Sesel. Nou annan en rev pour en meyer demen. Pour ki nou rev i ganny akonpli, i tre enportan ki lape, linite ek stabilite i rennyen partou dan nou pei.

«Nou ki pli aze, nou ki’n fer sa parkour lalit ansanm, nou konn sa tre byen. Tanto, mon mesaz i pour sa zenerasyon ki pe leve, sa zenerasyon ki pe monte. Les lape, linite, lanmour e respe vin parti zot lavi pour ki fitir Sesel i enn ki briye e asire,»Prezidan ti dir an fezan remarke ki nou’n akonpli bokou ansanm malgre serten i annan tandans pour oubliy sa.

Prezidan ti fer resorti ki nou byen isi Sesel, menm tre byen! I ti azoute ki progre ki nou’n fer depi ler nou’n ganny nou lendepandans i endenyab e i pou kontinyen koz lo la pour nou tou rapel.

«Sa pti pep Seselwa in fer bokou dan 40-an. Sa zenn pep Seselwa in ariv lwen dan son listwar, en listwar kourt konpare avek lezot pep.  E dan en lemonn ki deplizanpli konpleks, ki annan telman defi, nou kapab kontinyen fer progre – si nou ini, si nou travay ansanm. Si nou kapab anmenn diferan pwendvi, diferan lide, diskite, armonize, deside, e fer nou larout ansanm. 

«Me pa si nou divize. Progre ki nou’n fer dan 40-an i en progre ki serten pep ankor pe reve pour akonpli.  I en gro travay. I fasil pour serten dir ki nou pa kontan sa sistenm, nou a kase e apre nou a rekonstrir.  Me, ser frer ek ser Seselwa, larealite pa koumsa. Nou tou si nou pran en moman pour reflesir, ofon nou leker, nou konn sa,» Prezidan ti dir.

I ti menm fer rapel ki apre ki elektora ti elekte li pour en trwazyenm e dernyen manda, i ti dir zot ki se lademokrasi ki’n sorti venker dan sa gran legzersis kot Seselwa ti ganny apele pour swazir zot dirizan pour sa prosen 5-an.

«Mon ti soulinyen ki se pep Seselwa ki ti sorti venker. Lepep pou touzour sorti venker. Akoz nou krwar dan lademokrasi. Nou krwar dan lavenir Sesel. Dan lavenir nou zanfan.»

 

 

 

 

» Back to Archive