Follow us on:

Facebook Twitter LinkedIn YouTube

Archive -Seychelles

Zabitan Praslin I diskitsitiasyon drog lo zot zil |01 July 2016

 

Pour en premye fwa, zabitan Praslin in akeir en kolok lo drog lo zot zil.

Sa kolok ki ti’n ganny organize pour  konmemor lazournen enternasyonal kont labi drog ek trafik ilegal ki ganny selebre le 26 Zen, ti fer pandan de zour dan distrik Grand Anse.

Sete Minis pour Zafer Sosyal, Devlopman Kominoter ek Spor, Msye Vincent Meriton,ki ti ofisyelman ouver sa kolok dan prezans bann zofisye Konsey Drog ek Lalkol (Dac) sorti Mahe, ensi ki bann Pralinwa ek Digwa prezan.

Plizyer endividi sorti dan diferan lanplwa ti’n rann sa lapel pour aprann e diskit ansanm lo sitiasyon drog ek bann lezot lefe advers ki drog i anmennen lo sa de zil pros, ensi ki dan Sesel zeneralman.

Sa ti osi en loportinite pour zot partaz zot lopinyon lo bann metod ki kapab ede pour konbat sa fleo sosyal.

Plizyer prezantasyon ti ganny fer pour donn en pli bon limaz lo sitiasyon aktyel drog dan nou pei. Sa ti enkli prezantasyon par bann sant reabilitasyon enkli Sant Mont Royal ek Wellness Centre, lazans NDEA ek Prokirer Zeneral Rony Govinden ki ti partaz en pti pe bann sanzman dan lalwa konsernan santans dan bann ka drog.

Moses Barbe, administrater distrik pour Grand Anse Praslin, ti ganny sans pour donn en apersi lo sitiasyon drog lo Praslin ek La Digue, ki in dekri konman «agasan e enkyetan».

«I malere ki bokou zenn pe tonm dan sa latrap e bokou fanmir, espesyalman paran, pe soufer an rezilta,»Msye Barbe ti partaze.

Sa kolok,ki ti pe deroul anba tenm ‘Ekoute Avan’, ti osi oule fer resorti lenportans pour ekout bann zenn ek zanfan konman enn bann premye fason pour ed zot grandi e epanouir an bonn sante, lwen avek bann lenfliyans negativ.

Bann etidyan lekol Praslin ek La Digue segonder ti osi la pour partisipe e zot ti egalman ganny sans met devan pwennvi bann etidyan lo sa de zil lo bann mezir ki kapab ede dan sa lalit kont drog.

Sa ti swiv par en prezan tasyon ek diskisyon avek bann etidyan lekol segonder ki ti’n ganny organize par Dac ek Ceps pli boner sa semenn.

 

 

 

» Back to Archive