Selebrasyon 40enm Lanniverser nou Lendepandans ek Zournen Nasyonal le 29 Zen 2016 |01 July 2016

Sifco i rann gras Bondye pour benediksyon ki’n akord nou pei pour sa 40-an

Dirizan Konsey Enter-Relizye (Sifco), Monsenyer Legliz Katolik Denis Wiehe, ti reafirm konfyans dan Bondye nou kreater ek sover e remersye li pour tou sa benediksyon ki in akord nou pei pandan san 40-an nou lendepandans ki in dekri konman en lokazyon solanel.

Monsenyer Wiehe ti pe koz lo Stad Linite pandan selebrasyon 40enm lanniverser nou lendepandans ek Zournen Nasyonal.

Sifco i regroup Legliz Katolik Romen, Legliz Anglikann, Lafwa Baha’i, Sant Islamik pour Lenformasyon ek Gidans, Konsey Endou Sesel, Legliz Ortodoks Sesel, Lafwa Zoarastrian, Lasosiasyon Boudis Sesel ek Lalyans Evanzelik Sesel.

“Nou rann gras Bondye pour tou bann benediksyon e tou bann bon keksoz ki in beni nou avek pandan sa bann dernyen lannen.

“Nou remersye li pour tou bann lakonplisman ki nou’n arive fer pandan sa dernyen 40-an e ki pe aport fri.

“Nou kontinyen priy Bondye ki avek bokou pasyans ek mizerikord, pe touzour e kontinyelman manifeste son gran pouvwar ek son prezans dan nou lavi.

Parey Labib kretyen i dir, dan tou sirkonstans remersye Bondye. Sa i lavolonte Bondye,” Monsenyer Wiehe ti fer remarke.

I ti met lanfaz lo de pwen prensipal konsernan direksyon ki nou pei pe pran.

Premyerman i ti dir, la grann mazorite pep Seselwa i krwar dan Bondye e ki zot rekonnet prezans Bondye dan nou sosyete e dan limanite. E ki tou Seselwa i rekonnet labote nou pei avek son pep e tou son bann resours konman en kado merveye sorti kot Bondye. E ki sa i ganny ekrir dan nou Konstitisyon.

Alor i ti osi dir ki ozordi zot bann liders ek reprezantan Sifco, zot reafirm nesesite pour en renouvelman moral ek spirityel dan sosyete Seselwa.

“Nou senserman krwar ki solisyon pour tou nou bann mal sosyal i bezwen sorti dan sakenn de nou konman bann endividi. Parey lekritir sakre Bahai i rekonnet: ‘Vre boner i en kondisyon enteryer’.

Monsenyer ti osi dir ki nou bezwen rod avek bokou lenerzi labaz spirityel e materyel pour boner imen e en meyer lavi.

“Dezyenmman sa lape ek boner pou selman kapab vin atraver en renouvelman profon lavi lafanmir dan nou pei. Akoz dan nenport ki sosyete, lafanmir i sours lavi. Se dan lafanmir ki sak endividi i aprann disiplin, bann lareg ek bann valer fondamantal pour nou viv ansanm dan lape,” i ti dir.

An sitan lasazes bann Endou, Monsenyer ti dir: “Ler bann valer spirityel i ganny detri dan en sosyete, lemal i vin predominan e an rezilta lenstitisyon parey lafanmir i ganny afekte”.

Alor konman bann reprezantan relizye, Monsenyer Wiehe ti dir ki zot anvi fer en lapel avek bann gran paran, paran, bann zanfan e tou bann mouvman ki promot lavi lafanmir, osi byen ki gouvernman lo nivo distrik ek kominoter, pour kontinyen travay avek bokou plis zefor e dan zot langazman pour amelyor lavi lafanmir dan Sesel.

“Se atraver lafanmir ki en vre renouvelman i posib onivo sosyal, moral e spirityel,” i ti azoute.

Monseyer ti osi fer en lapel ki ledikasyon moral ek spirityel tou nou zanfan depi pti anfans, ziska lekol segonder e osi apre, i ganny revwar e renouvle an kolaborasyon avek bann lider relizye nou pei.

Sifco, atraver Monsenyer Wiehe, ti osi eksprim konsern pour divizyon e mank linite antre nou ki i dir i kre mefyans antre nou, detourn nou latansyon e retard nou progre ek pei. Alors i ti lans en lapel pour nou tou annan volonte e determinasyon pour rod lorizin ek lakoz nou bann divizyon e travay ver en linite ki sirpas tou sa ki nou’n konnen ziska prezan.

M. Julie